எலான் மஸ்க்கின் சமூக வலைதளமான X, தனது சேவையை சமூக ஊடகத்தைத் தாண்டி நிதிச் சேவைகளிலும் விரிவுபடுத்தும் முக்கிய நடவடிக்கையாக 'X Money' என்ற புதிய சேவையை அமெரிக்காவில் அறிமுகப்படுத்தியுள்ளது. தொடக்கத்தில் இந்த சேவை X Premium மற்றும் Premium+ பயனர்களுக்கு வழங்கப்பட்டு வருகிறது.
X Money மூலம் பயனர்கள் டிஜிட்டல் வாலெட் பயன்படுத்துதல், ஒருவரிடமிருந்து மற்றொருவருக்கு உடனடி பணப் பரிமாற்றம் (P2P), வங்கி கணக்குகளுக்கு பணம் அனுப்புதல், பில்கள் செலுத்துதல், சம்பளத்தை நேரடியாகப் பெறுதல் உள்ளிட்ட பல்வேறு நிதிச் சேவைகளை X செயலியிலேயே பயன்படுத்த முடியும். மேலும், Visa டெபிட் கார்டு மற்றும் Apple Wallet ஆதரவும் இதில் இடம்பெற்றுள்ளது.
இந்த புதிய சேவை, X-ஐ ஒரு "Everything App" ஆக மாற்ற வேண்டும் என்ற எலான் மஸ்க்கின் நீண்டகால இலக்கில் முக்கிய மைல்கல்லாகக் கருதப்படுகிறது. எதிர்காலத்தில் வங்கி, முதலீடு மற்றும் கூடுதல் நிதிச் சேவைகளையும் ஒரே தளத்தில் வழங்கும் திட்டம் இருப்பதாக தகவல்கள் தெரிவிக்கின்றன.
இருப்பினும், இந்த சேவைக்கு அமெரிக்காவில் ஒழுங்குமுறை அமைப்புகள் மற்றும் அரசியல் வட்டாரங்களிடமிருந்து கவனமும் எழுந்துள்ளது. பயனர்களின் நிதி பாதுகாப்பு, தனியுரிமை மற்றும் நிதி அமைப்பின் நிலைத்தன்மை தொடர்பான கேள்விகள் எழுப்பப்பட்டுள்ளன.