கும்மிடிப்பூண்டியில் வியாபாரிகள் ஆர்ப்பாட்டம்: ரூ.1 கோடி நஷ்டம் என குற்றச்சாட்டு

கும்மிடிப்பூண்டியில் நெடுஞ்சாலைத்துறை ஆக்கிரமிப்பு அகற்றும் நடவடிக்கையின் போது, முறையான முன்னறிவிப்பின்றி தங்களது கடைகளின் பெயர் பலகைகள், கதவுகள் மற்றும் முன் கூரைகள் சேதப்படுத்தப்பட்டதாகக் கூறி வியாபாரிகள் ஆர்ப்பாட்டத்தில் ஈடுபட்டுள்ளனர். பொதுமக்களுக்கும் வாகன ஓட்டிகளுக்கும் எந்தவிதமான இடையூறும் இல்லாத பகுதியில் அமைந்திருந்த 200-க்கும் மேற்பட்ட கடைகள் இந்த நடவடிக்கையால் பாதிக்கப்பட்டுள்ளதாக வியாபாரிகள் குற்றம்சாட்டியுள்ளனர். இந்த திடீர் நடவடிக்கையின் காரணமாக தங்களுக்குச் சுமார் ஒரு கோடி ரூபாய் அளவுக்குப் பொருளாதார நஷ்டம் ஏற்பட்டுள்ளதாகத் தெரிவித்துள்ள வியாபாரிகள், இதற்கு உரிய நிவாரணம் வழங்கப்பட வேண்டும் என்றும் கோரிக்கை விடுத்துள்ளனர்.