திருப்பத்தூர் மாவட்டம், ஆம்பூர் புறவழிச்சாலை பகுதியில் உரிய அனுமதியின்றி பதுக்கி வைக்கப்பட்டிருந்த ரூ. 10 லட்சம் மதிப்பிலான பட்டாசுகள் மற்றும் வெடிபொருட்களைக் குற்றப்புலனாய்வுத் துறை அதிகாரிகள் பறிமுதல் செய்துள்ளனர்.
ஆம்பூர் புறவழிச்சாலையில் சட்டவிரோதமாகப் பட்டாசுகள் மற்றும் வெடிபொருட்கள் பதுக்கி வைக்கப்பட்டுள்ளதாகக் குற்றப்புலனாய்வுத் துறையினருக்கு ரகசியத் தகவல் கிடைத்தது. இதனையடுத்து, குற்றப்புலனாய்வுத் துறை அதிகாரிகளும், ஆம்பூர் நகரக் காவல்துறையினரும் இணைந்து அப்பகுதியில் தீவிரச் சோதனையில் ஈடுபட்டனர்.
இந்த சோதனையின்போது, தீபாவளி பண்டிகையை முன்னிட்டு ஸ்ரீனிவாசன் என்பவர் உரிய அனுமதியின்றி குடோனில் பட்டாசுகளைப் பதுக்கி வைத்திருந்தது கண்டறியப்பட்டது. இதனையடுத்து, சுமார் ரூ. 10 லட்சம் மதிப்பிலான பட்டாசுகளைக் காவல்துறையினர் பறிமுதல் செய்தனர்.
இந்தச் சம்பவம் தொடர்பாக ஆம்பூர் நகரக் காவல்துறையினர் வழக்குப்பதிவு செய்து, கடை உரிமையாளரிடம் தீவிர விசாரணை மேற்கொண்டு வருகின்றனர். உரிய அனுமதியின்றிப் பட்டாசுகள் பதுக்கப்பட்டிருந்த இச்சம்பவம் அப்பகுதியில் பரபரப்பை ஏற்படுத்தியுள்ளது.