தென்கிழக்கு வங்கக்கடல் மற்றும் அதனை ஒட்டிய அந்தமான் நிக்கோபார் தீவுகள் மற்றும் அந்தமான் கடல் பகுதிகளில் நிலவிய ஆழ்ந்த காற்றழுத்தத் தாழ்வுப் பகுதி, மேற்கு-வடமேற்கு திசையில் நகர்ந்து காற்றழுத்தத் தாழ்வு மண்டலமாக வலுப்பெற்றுள்ளது.
இந்தக் காற்றழுத்தத் தாழ்வு மண்டலமானது, ஸ்ரீ விஜயபுரத்திலிருந்து தென்மேற்கு திசையில் சுமார் 330 கி.மீ. தொலைவிலும், கார் நிக்கோபாரிலிருந்து வடமேற்கு திசையில் சுமார் 300 கி.மீ. தொலைவிலும், சென்னையிலிருந்து தென்கிழக்கே சுமார் 1,140 கி.மீ. தொலைவிலும், மச்சிலிப்பட்டினத்திலிருந்து தென்கிழக்கே சுமார் 1,200 கி.மீ. தொலைவிலும் நிலைகொண்டுள்ளது.
இது அடுத்த 12 மணி நேரத்தில் மேற்கு-வடமேற்கு திசையில் நகர்ந்து, தென்கிழக்கு வங்கக்கடல் பகுதியில் ஆழ்ந்த காற்றழுத்தத் தாழ்வு மண்டலமாக வலுப்பெறக்கூடும். தொடர்ந்து மேற்கு-வடமேற்கு திசையில் நகர்ந்து, அதற்கடுத்த 12 மணி நேரத்தில் தென்கிழக்கு மற்றும் அதனை ஒட்டிய தென்மேற்கு, மத்திய மேற்கு வங்கக்கடல் பகுதிகளில் புயலாக மாறக்கூடும் என எதிர்பார்க்கப்படுகிறது. இந்தப் புயல் வரும் நவம்பர் 2ஆம் தேதி மாலை ஆந்திரப் பிரதேசக் கடற்கரையை ஒட்டிய மத்திய மேற்கு வங்கக்கடல் பகுதியில் நிலைகொள்ளக்கூடும் என்று வானிலை மையம் கணித்துள்ளது.
புயல் சின்னம் உருவாகும் சாத்தியக்கூறுகள் காரணமாக, நாகப்பட்டினம், கடலூர், சென்னை, தூத்துக்குடி, புதுச்சேரி, காரைக்கால் உள்ளிட்ட 9 துறைமுகங்களில் 1ஆம் எண் புயல் எச்சரிக்கை கூண்டு ஏற்றப்பட்டுள்ளது.