விலைவாசி உயர்வு, சட்டம்-ஒழுங்கு சீர்கேடு மற்றும் பெண்கள் பாதுகாப்பு இன்மையை கண்டித்து, விழுப்புரம் புதிய பேருந்து நிலையம் அருகில் உள்ள நகராட்சி திடலில் நாளை காலை 10 மணிக்கு தி.மு.க. சார்பில் மாபெரும் கண்டன ஆர்ப்பாட்டம் நடைபெற உள்ளது.
விழுப்புரம் மத்திய மாவட்ட தி.மு.க. பொறுப்பாளர் லட்சுமணன் எம்.எல்.ஏ. வெளியிட்டுள்ள அறிக்கையின்படி, விழுப்புரம் மத்திய, தெற்கு மற்றும் வடக்கு மாவட்ட தி.மு.க. மகளிர் அணி சார்பில் இந்த ஆர்ப்பாட்டம் ஒருங்கிணைக்கப்பட்டுள்ளது.
இந்த ஆர்ப்பாட்டத்திற்கு விழுப்புரம் மத்திய மாவட்ட மகளிர் அணி அமைப்பாளர் ஏ.ஜி. செல்வி தலைமை தாங்குகிறார். தெற்கு மாவட்ட மகளிர் அணி அமைப்பாளர் அமுதா வரவேற்புரை நிகழ்த்துகிறார். மாவட்ட நிர்வாகிகள், மகளிர் தொண்டர் அணி அமைப்பாளர்கள், ஒன்றிய செயலாளர்கள் மற்றும் துணை அமைப்பாளர்கள் முன்னிலை வகிக்கின்றனர்.
மாநில மகளிர் அணி பிரச்சார குழு செயலாளர் தேன்மொழி மற்றும் முன்னாள் சட்டமன்ற உறுப்பினர் சீதாபதி சொக்கலிங்கம் ஆகியோர் கண்டன உரையாற்றுகின்றனர். நிறைவாக, விழுப்புரம் வடக்கு மாவட்ட மகளிர் அணி அமைப்பாளர் திலகவதி நன்றி உரையாற்றுகிறார்.
இந்த ஆர்ப்பாட்டத்தில் மாவட்டத்தின் பல்வேறு நிலைகளில் உள்ள மகளிர் அணி நிர்வாகிகள், தொண்டர்கள் மற்றும் உள்ளாட்சி அமைப்புகளின் முன்னாள் மற்றும் இந்நாள் தலைவர்கள் அனைவரும் தவறாமல் கலந்துகொள்ளுமாறு கேட்டுக்கொள்ளப்பட்டுள்ளனர்.