பிரபல இயக்குநர் கிறிஸ்டோபர் நோலன் இயக்கத்தில் உருவாகி உலகெங்கும் வெளியாகியுள்ள 'The Odyssey' திரைப்படத்தின் திருட்டுப் பதிவு சமூக வலைதளங்களில் கசிந்திருப்பது திரை உலகில் பெரும் அதிர்ச்சியை ஏற்படுத்தியுள்ளது. இதனையடுத்து, படத்தின் தயாரிப்பு மற்றும் விநியோக நிறுவனமான Universal Pictures, காப்புரிமை மீறலுக்கு எதிராகக் கடுமையான சட்ட நடவடிக்கைகளைத் தொடங்கியுள்ளது.
திரையரங்குகளில் வெற்றிகரமாகத் திரையிடப்பட்டு வரும் இத்திரைப்படத்தின் உயர்தர (HD) திருட்டுப் பதிவு, சில சமூக வலைதளப் பக்கங்களில் பதிவேற்றப்பட்டு, குறுகிய நேரத்திலேயே ஆயிரக்கணக்கானோரால் பார்வையிடப்பட்டுள்ளது. இது குறித்துத் தகவல் அறிந்தவுடனேயே, அத்தகைய பதிவுகளை இணையத்திலிருந்து அகற்றும் பணிகள் போர்க்கால அடிப்படையில் முடுக்கப்பட்டுள்ளதாகத் தயாரிப்பு நிறுவனம் தெரிவித்துள்ளது.
இது தொடர்பாக யுனிவர்சல் பிக்சர்ஸ் வெளியிட்டுள்ள அதிகாரப்பூர்வ அறிக்கையில், "திரைப்படத்தின் காப்புரிமையைப் பாதுகாப்பதும், படைப்பாளிகளின் உழைப்பை மதிப்பவதும் எங்களின் முதன்மைப் பொறுப்பாகும். சட்டவிரோதமாக இந்த உள்ளடக்கத்தைப் பகிர்வோர் மற்றும் பதிவேற்றம் செய்வோர் மீது பாரபட்சமின்றி உரிய சட்ட நடவடிக்கைகள் எடுக்கப்படும்" என எச்சரித்துள்ளது.
கிரேக்கக் காவியமான ஹோமரின் 'Odyssey'-யை அடிப்படையாகக் கொண்டு, கிறிஸ்டோபர் நோலனின் பிரம்மாண்ட இயக்கத்தில் உருவாகியுள்ள இத்திரைப்படத்தில் மேட் டேமன், டாம் ஹாலண்ட், சென்டயா, ஆன் ஹாதவே உள்ளிட்ட முன்னணி ஹாலிவுட் நட்சத்திரங்கள் பலர் நடித்துள்ளனர்.
திரையரங்குகளில் படம் பெருமளவில் வரவேற்பைப் பெற்று வரும் சூழலில், இத்தகைய இணையக் கசிவுச் சம்பவம், திரைத் துறையை மீண்டும் அச்சுறுத்தி வரும் 'திரைப்படத் திருட்டு' (Piracy) குறித்த விவாதங்களை மீண்டும் தீவிரப்படுத்தியுள்ளது.