வேலூர் மாவட்டம், அணைக்கட்டு தாலுகா அலுவலக கூட்டரங்கில் தாலுகா அளவிலான விவசாயிகள் குறைதீர்வு கூட்டம் நடைபெற்றது. கூட்டத்திற்கு தாசில்தார் ச.மகேஷ்வரி தலைமை தாங்கினார்.
இந்தக் கூட்டத்தில் சமூக பாதுகாப்பு திட்ட தாசில்தார் பழனி, வட்ட வழங்கல் அலுவலர் கீதா, தலைமையிடத்து துணை தாசில்தார் ரமேஷ், தலைமை நில அளவர் ஜெயகார்த்திகா ஆகியோர் முன்னிலை வகித்தனர். பல்வேறு அரசுத்துறை அதிகாரிகளுடன், 100-க்கும் மேற்பட்ட விவசாயிகள் இதில் கலந்து கொண்டனர்.
கூட்டத்தில் விவசாயிகள் தரப்பில் முன்வைக்கப்பட்ட முக்கிய கோரிக்கைகள்:
- ஊர் சுற்றுவட்டாரப் பகுதிகளில் விவசாய பம்புசெட்டுகளுக்கு மின்சாரம் கொண்டு செல்லும் வயர்களை மர்ம நபர்கள் திருடிச் செல்வதால் விவசாயப் பணிகள் பாதிக்கப்படுகின்றன. இத்தகையவர்கள் மீது காவல்துறை உரிய நடவடிக்கை எடுக்க வேண்டும்.
- அணைக்கட்டு தாலுகாவில் அதிக அளவில் முருங்கை சாகுபடி செய்யப்படுவதால், முருங்கைக்கீரையை பவுடராக தயாரித்து வெளிநாடுகளுக்கு ஏற்றுமதி செய்ய நடவடிக்கை எடுக்க வேண்டும்.
- விவசாய நிலங்களில் பயிர்களுக்கு இடையே முளைக்கும் களைச் செடிகளைக் கட்டுப்படுத்த வேளாண்மைத்துறை அதிகாரிகள் உதவ வேண்டும்.
- அணைக்கட்டு தாலுகாவில் நடைபெற்ற ஜமாபந்தியில் விவசாயிகள் அளித்த மனுக்கள் மீது விரைந்து நடவடிக்கை எடுக்க வேண்டும்.
- அகரம் ஏரியில் ஆக்கிரமிப்பு செய்து கட்டப்பட்டுள்ள வீடுகளை அகற்ற வேண்டும்.
- விவசாயிகளுக்கு வழங்கப்பட்டுள்ள பயிர்க்கடன்களை முழுமையாக தள்ளுபடி செய்ய வேண்டும்.
விவசாயிகள் முன்வைத்த கோரிக்கைகள் மற்றும் சந்தேகங்களுக்கு சம்பந்தப்பட்ட துறை அதிகாரிகள் விளக்கம் அளித்தனர். விவசாயிகளின் கோரிக்கைகள் அனைத்தும் உயர் அதிகாரிகளின் கவனத்திற்கு கொண்டு செல்லப்பட்டு, விரைந்து உரிய நடவடிக்கைகள் மேற்கொள்ளப்படும் என்று தாசில்தார் மகேஷ்வரி உறுதியளித்தார்.