திருப்பத்தூர் மாவட்ட ஆட்சியர் அலுவலகத்தில், குழந்தைகள் நலன் மற்றும் சிறப்பு சேவைகள் துறை மற்றும் மாவட்ட குழந்தைகள் பாதுகாப்பு அலகு சார்பில் கிராம நிர்வாக அலுவலர்களுக்கான திறன் வளர்ப்புப் பயிற்சி நடைபெற்றது. இந்த நிகழ்வில் சிறப்பு அழைப்பாளராகக் கலந்துகொண்டு பயிற்சியைத் தொடங்கி வைத்த மாவட்ட ஆட்சியர் நல்லசிவம், குழந்தை திருமணங்களைத் தடுப்பதில் கிராம நிர்வாக அலுவலர்கள் முக்கியப் பங்காற்ற வேண்டும் என வலியுறுத்தினார்.
நிகழ்ச்சியில் மாவட்ட குழந்தைகள் பாதுகாப்பு அலுவலர் உமா மகேஸ்வரி மற்றும் பல்வேறு அரசுத் துறை அதிகாரிகள் உடனிருந்தனர். அப்போது பேசிய மாவட்ட ஆட்சியர், குழந்தை திருமணங்கள் அதிகமாக நடைபெறும் கிராமங்களைக் கண்டறிந்து, அங்கு தடுப்பு நடவடிக்கைகளைத் தீவிரப்படுத்துமாறு அதிகாரிகளிடம் கேட்டறிந்தார். மேலும், கிராம நிர்வாக அலுவலர்கள் கூடுதல் கவனத்துடன் செயல்பட்டு, குழந்தை திருமணம் நடைபெறுவதற்கான அறிகுறிகள் தென்பட்டால் உடனடியாக சம்பந்தப்பட்ட அதிகாரிகளுக்குத் தகவல் தெரிவிக்க வேண்டும் என்றார்.
தகவல் பரிமாற்றத்தை விரைவுபடுத்த கிராம நிர்வாக அலுவலர்கள் ஒருங்கிணைந்து வாட்ஸ்அப் குழுக்களை உருவாக்க வேண்டும் என்றும், இதன் மூலம் துறை சார்ந்த அதிகாரிகளுடன் இணைந்து உடனடித் தடுப்பு நடவடிக்கைகளை மேற்கொள்ள முடியும் என்றும் அவர் அறிவுறுத்தினார்.
தொடர்ந்து, பெற்றோரை இழந்த மற்றும் ஆதரவற்ற குழந்தைகளை அடையாளம் கண்டு அவர்களுக்குத் தேவையான பாதுகாப்பு, கல்வி மற்றும் உதவிகளை வழங்குவது குறித்தும் பயிற்சியில் எடுத்துரைக்கப்பட்டது. நிகழ்ச்சியின் நிறைவில், மாவட்ட ஆட்சியர் முன்னிலையில் கிராம நிர்வாக அலுவலர்கள் குழந்தை திருமணத் தடுப்பு உறுதிமொழி ஏற்றுக்கொண்டனர்.