விருதுநகர் மாவட்டத்தில் தீபாவளி பண்டிகையை முன்னிட்டு இனிப்பு மற்றும் கார பலகாரங்களைச் சுகாதாரமற்ற முறையில் தயாரித்து விற்பனை செய்தால் கடுமையான நடவடிக்கை எடுக்கப்படும் என்று மாவட்ட ஆட்சித்தலைவர் ஷரண்யா ஹறி எச்சரித்துள்ளார்.
தீபாவளி பண்டிகை காலத்தில் பொதுமக்களுக்குத் தரமான மற்றும் பாதுகாப்பான உணவுப் பொருட்கள் கிடைப்பதை உறுதி செய்யும் வகையில் உணவு வணிகர்களுக்கான வழிகாட்டுதல்களை அவர் வெளியிட்டுள்ளார். அதன்படி, தற்காலிக மற்றும் நிரந்தரக் கடைகள் நடத்தும் அனைத்து வணிகர்களும் https://foscos.fssai.gov.in என்ற இணையதளத்தில் விண்ணப்பித்து உணவுப் பாதுகாப்பு உரிமம் பெறுவதோடு, அதனை உரிய முறையில் கடைகளில் காட்சிப்படுத்த வேண்டும்.
முக்கிய உணவுப் பாதுகாப்பு நெறிமுறைகள்:
- உணவுப் பாதுகாப்பு உரிமம் பெற்ற தரமான மூலப்பொருட்களைக் கொண்டே பலகாரங்களைத் தயாரிக்க வேண்டும். ஈக்கள் மொய்க்காத மற்றும் அசுத்தமற்ற சுகாதாரமான சூழல் பராமரிக்கப்பட வேண்டும்.
- அனுமதிக்கப்படாத செயற்கை நிறமிகளைப் பயன்படுத்துவது தடை செய்யப்பட்டுள்ளது. அனுமதிக்கப்பட்ட நிறமிகளை மட்டுமே உரிய அளவில் பயன்படுத்த வேண்டும்.
- சமையல் எண்ணெயை ஒருமுறை மட்டுமே பயன்படுத்த வேண்டும். பயன்படுத்திய மீதமுள்ள எண்ணெயை மீண்டும் சூடாக்கிப் பயன்படுத்துவது முற்றிலுமாகத் தடை செய்யப்பட்டுள்ளது; அத்தகைய எண்ணெய்ப் பயோ-டீசல் தயாரிப்புக்கு வழங்கப்பட வேண்டும்.
- பலகாரங்கள் மற்றும் பரிசுப் பெட்டிகளில் (Gift Box) தயாரிப்பு நாள், காலாவதி நாள் மற்றும் உணவுப் பாதுகாப்பு உரிமம் எண் ஆகிய விவரங்கள் கட்டாயம் அச்சிடப்பட்டிருக்க வேண்டும்.
- பலகாரங்கள் தயாரிக்கப் பயன்படுத்தப்படும் நெய் மற்றும் சமையல் எண்ணெய் விவரங்களை நுகர்வோர் பார்க்கும் வகையில் காட்சிப்படுத்த வேண்டும்.
- உணவுத் தயாரிப்பு மற்றும் விற்பனையில் ஈடுபடும் பணியாளர்கள் டைஃபாய்டு மற்றும் மஞ்சள் காமாலைக்கான தடுப்பூசி செலுத்தியிருக்க வேண்டும். மேலும், அவர்கள் முகக்கவசம் மற்றும் கையுறைகளைப் பயன்படுத்த வேண்டும்.
- தமிழ்நாடு அரசால் தடைசெய்யப்பட்ட ஒருமுறை பயன்படுத்தும் பிளாஸ்டிக் பொருட்களைப் பயன்படுத்தக் கூடாது.
- பலகாரங்கள் தயாரிக்கப் பயன்படுத்தும் நீரின் தரம் குறித்து அரசால் அங்கீகரிக்கப்பட்ட பகுப்பாய்வுக்கூட அறிக்கையைப் பராமரிக்க வேண்டும்.
உணவுப் பாதுகாப்புத் துறை அதிகாரிகள் பலகாரத் தயாரிப்பு நிலையங்களில் திடீர் ஆய்வு மேற்கொண்டு மாதிரி சேகரிக்கவும், தரம் மற்றும் பாதுகாப்பற்ற முறையில் செயல்படுவோர் மீது சட்ட நடவடிக்கை எடுக்கவும் உத்தரவிடப்பட்டுள்ளது.
நுகர்வோர்கள் உணவுப் பாதுகாப்புத் துறையில் பதிவு பெற்ற கடைகளில் மட்டுமே பலகாரங்களை வாங்குமாறும், விவரச்சீட்டு உள்ள பொருட்களை மட்டும் வாங்குமாறும் அறிவுறுத்தப்படுகிறார்கள். தரம் குறைபாடு அல்லது சுகாதாரமற்ற கடைகள் குறித்து புகார் அளிக்க விரும்பும் பொதுமக்கள், மாவட்ட உணவுப் பாதுகாப்புத் துறை அலுவலக எண்ணான 04562-225255 அல்லது மாநில உணவுப் பாதுகாப்புத் துறை ஆணையர் அலுவலக வாட்ஸ்அப் எண் 9444042322 ஆகிய எண்களைத் தொடர்பு கொள்ளலாம் என்றும், புகார்தாரர்களின் ரகசியம் காக்கப்படும் என்றும் மாவட்ட ஆட்சித்தலைவர் தெரிவித்துள்ளார்.