திருவண்ணாமலையில் கிலோ கணக்கில் பட்டாசு விற்பனை என்ற பெயரில் நடைபெறும் முறைகேடுகளைத் தடுக்கக் கோரி, மாவட்ட பட்டாசு வியாபாரிகள் சங்கம் சார்பில் வருவாய் கோட்டாட்சியரிடம் (RDO) மனு அளிக்கப்பட்டுள்ளது.
திருவண்ணாமலை மாவட்ட பட்டாசு வியாபாரிகள் சங்கத் தலைவர் ராஜசேகர் தலைமையில், சங்க நிர்வாகிகள் இன்று திருவண்ணாமலை வருவாய் கோட்டாட்சியர் செல்வத்தை நேரில் சந்தித்து இந்த மனுவை அளித்தனர். அந்த மனுவில், பட்டாசுகளை கிலோ கணக்கில் விற்பனை செய்வதாகக் கூறி, தரம் குறைந்த பட்டாசுகளை அதிக விலைக்கு விற்பனை செய்யும் போக்கு அதிகரித்துள்ளதாகக் குற்றம் சாட்டப்பட்டுள்ளது.
இந்த முறைகேடான விற்பனை முறையால் நுகர்வோர் பாதிக்கப்படுவதாகவும், முறையான உரிமம் இன்றி செயல்படும் இத்தகைய விற்பனையாளர்கள் மீது உரிய நடவடிக்கை எடுக்க வேண்டும் என்றும் வியாபாரிகள் வலியுறுத்தியுள்ளனர். இந்த நிகழ்வின் போது சங்கப் பொறுப்பாளர்கள் சேட்டு, கார்த்திகேயன், அறிவழகன் மற்றும் மண்ணுலிங்கம் உள்ளிட்டோர் உடனிருந்தனர்.