திருப்பத்தூர் மாவட்டம், ராவத்தம்பட்டி பகுதியைச் சேர்ந்தவர் சரஸ்வதி (61). இவர் இன்று அதிகாலை 5.45 மணியளவில் அப்பகுதியில் உள்ள ஏரிக்கரைக்குச் சென்றபோது, அங்கு மறைந்திருந்த மர்ம நபர் ஒருவர் அவரைத் தாக்கி, கழுத்தில் இருந்த தாலியைப் பறிக்க முயன்றுள்ளார்.
மூதாட்டியின் அலறல் சத்தம் கேட்டு அவரது கணவர் கோவிந்தராஜ் சம்பவ இடத்திற்கு விரைந்து வந்ததைக் கண்ட மர்ம நபர், இருசக்கர வாகனத்தில் அங்கிருந்து தப்பிச் சென்றார். இந்தத் தாக்குதலில் சரஸ்வதிக்கு பற்கள் உடைந்தும், கண்ணில் காயமும் ஏற்பட்டுள்ளது. அவர் திருப்பத்தூரில் உள்ள தனியார் மருத்துவமனையில் சிகிச்சை பெற்று வருகிறார்.
இந்தச் சம்பவம் குறித்து திருப்பத்தூர் கிராமிய காவல் நிலையத்தில் புகார் அளிக்கப்பட்டுள்ளது. புகாரின் அடிப்படையில் வழக்குப்பதிவு செய்துள்ள காவல்துறையினர், தப்பி ஓடிய மர்ம நபரைத் தீவிரமாகத் தேடி வருகின்றனர்.