ராமநாதபுரம் மாவட்டம், ரகுநாதபுரம் அருகே உள்ள வண்ணாங்குண்டு ஊராட்சிக்கு உட்பட்ட இலங்காமணி கிராமத்தில், மூன்று தலைமுறைகளாகப் பொதுமக்கள் பயன்படுத்தி வந்த சுடுகாட்டை மீட்டுத் தரக்கோரி கிராம மக்கள் திடீர் குடியிருப்புப் போராட்டத்தில் ஈடுபட்டுள்ளனர்.
இலங்காமணி கிராமத்தில் 500-க்கும் மேற்பட்ட மக்கள் வசித்து வருகின்றனர். இக்கிராம மக்களின் இறுதிச் சடங்குகளுக்காகப் பயன்படுத்தப்பட்டு வரும் பொதுச் சுடுகாட்டை, ரியல் எஸ்டேட் தொழிலில் ஈடுபட்டுள்ள சிலர் ஆக்கிரமித்துள்ளதாகக் கூறப்படுகிறது. மேலும், அங்கு ஜேசிபி இயந்திரங்கள் மற்றும் டிராக்டர்கள் உள்ளிட்ட கனரக வாகனங்களை நிறுத்தி நிலத்தைச் சேதப்படுத்தி வருவதாகவும் கிராம மக்கள் குற்றம் சாட்டுகின்றனர்.
இதுகுறித்து மாவட்ட ஆட்சியர், வட்டாட்சியர் மற்றும் வருவாய்த்துறை அதிகாரிகளிடம் பலமுறை புகார் மனுக்கள் அளித்தும் இதுவரை உரிய நடவடிக்கை எடுக்கப்படவில்லை எனப் பொதுமக்கள் வேதனை தெரிவிக்கின்றனர். ஏற்கனவே இதுதொடர்பாக ஆர்ப்பாட்டம் நடத்தப்பட்ட போதிலும், அதிகாரிகள் உறுதியளித்தபடி எந்த நடவடிக்கையும் எடுக்கப்படவில்லை எனக் கூறி தற்போது சுடுகாட்டுப் பகுதியிலேயே குடியிருப்புப் போராட்டத்தில் ஈடுபட்டுள்ளனர்.
இப்போராட்டம் காரணமாக அப்பகுதியில் பரபரப்பான சூழல் நிலவி வருவதை அடுத்து, அசம்பாவிதங்களைத் தடுக்கும் வகையில் போலீசார் குவிக்கப்பட்டு பாதுகாப்புப் பணியில் ஈடுபட்டு வருகின்றனர். நில ஆவணங்களைச் சரிபார்த்து ஆக்கிரமிப்பை அகற்றி, சுடுகாட்டை மீண்டும் பொதுமக்கள் பயன்பாட்டிற்கு வழங்க வேண்டும் என்பதே கிராம மக்களின் பிரதான கோரிக்கையாக உள்ளது.