ராமநாதபுரம் மாவட்டத்தில் உள்ள அரசுப் பள்ளிகளில் உள்கட்டமைப்பு வசதிகளை மேம்படுத்துவது மற்றும் நடுநிலைப் பள்ளியை மேல்நிலைப் பள்ளியாகத் தரம் உயர்த்துவது குறித்து மாவட்ட ஆட்சியர் சிவ குரு பிரபாகரன் நேரில் ஆய்வு மேற்கொண்டார்.
ராமநாதபுரம் அரசு நகராட்சி பெண்கள் மேல்நிலைப் பள்ளியில், மாணவிகளுடன் மாணவர்களும் சேர்ந்து கல்வி பயிலும் வகையில் அப்பள்ளியை இருபாலரும் பயிலும் பள்ளியாக மாற்றுவதற்குத் தேவையான உள்கட்டமைப்பு மற்றும் கூடுதல் வகுப்பறைகள் உள்ளிட்ட அடிப்படை வசதிகள் குறித்து அவர் ஆய்வு செய்தார்.
தொடர்ந்து, வள்ளல் பாரி நகராட்சி நடுநிலைப் பள்ளியை மேல்நிலைப் பள்ளியாகத் தரம் உயர்த்துவது தொடர்பாக ஆட்சியர் ஆய்வு மேற்கொண்டார். அங்குள்ள வகுப்பறைகள், மாணவர்களின் எண்ணிக்கை மற்றும் மேல்நிலைப் பள்ளிக்குத் தேவையான கூடுதல் கட்டட வசதிகள் குறித்து கேட்டறிந்த அவர், தரம் உயர்த்துவதற்கான உரிய நடவடிக்கைகளை மேற்கொள்ள அதிகாரிகளுடன் ஆலோசனையும் நடத்தினார்.