மயிலாடுதுறை சின்னக்கடை வீதியில் அமைந்துள்ள பிரசித்தி பெற்ற ஸ்ரீ சித்தி விநாயகர் ஆலயத்தில், கும்பாபிஷேக தினத்தை முன்னிட்டு சம்வத்ஸராபிஷேகமும், ஐப்பசி மாத சங்கடகர சதுர்த்தி விழாவும் சிறப்பாகக் கொண்டாடப்பட்டது.
கச்சேரி பிள்ளையார் கோவில் என்று அழைக்கப்படும் இவ்வாலயத்தில் நடைபெற்ற விழாவையொட்டி, மூலவர் ஸ்ரீ சித்தி விநாயகருக்கு பால், தயிர், பன்னீர், சந்தனம் மற்றும் பல்வேறு வாசனை திரவியங்களால் சிறப்பு அபிஷேகங்கள் செய்யப்பட்டன. அதனைத் தொடர்ந்து, சிறப்பு அலங்காரங்கள் செய்யப்பட்டு பஞ்சமுக மகாதீபாராதனை காண்பிக்கப்பட்டது.
இந்த வழிபாட்டு நிகழ்வில் அப்பகுதியைச் சேர்ந்த ஏராளமான பக்தர்கள் கலந்துகொண்டு, சுவாமி தரிசனம் செய்து அர்ச்சனை செய்தனர். வாழ்வில் வளமும் சுபிட்சமும் பெற வேண்டியும் அவர்கள் பிரார்த்தனை மேற்கொண்டனர். விழாவின் நிறைவில் பக்தர்களுக்கு பிரசாதம் வழங்கப்பட்டது.