திருப்பத்தூர் மாவட்டம், கந்திலி ஊராட்சி ஒன்றியம் குனிச்சி பகுதியில் உள்ளாட்சிகள் தினத்தை முன்னிட்டு நடைபெற்ற கிராம சபை கூட்டத்தில், வெளியூர் மாற்று சமூகத்தினருக்கான சுடுகாடு அமைக்கும் திட்டத்திற்கு எதிர்ப்பு தெரிவித்து கிராம மக்கள் கூட்டத்தைப் புறக்கணித்தனர்.
கந்திலி வட்டார வளர்ச்சி அலுவலர் ஆணிகிரேஸ் தலைமையில் நடைபெற்ற கூட்டத்தில், அப்பகுதியில் உள்ள சுமார் 11 ஏக்கர் புறம்போக்கு நிலத்தில், 3 ஏக்கர் பரப்பளவில் வெளியூரைச் சேர்ந்தவர்களுக்காக சுடுகாடு அமைக்க நிதி ஒதுக்கப்பட்டதாகக் கூறப்படுகிறது. கிராம ஊராட்சியில் முறையான தீர்மானம் நிறைவேற்றாமல் இந்தத் திட்டம் கொண்டுவரப்பட்டதாகக் கூறி பொதுமக்கள் கடும் எதிர்ப்பு தெரிவித்தனர்.
அதிகாரிகளிடம் இருந்து முறையான பதில் கிடைக்காததால் ஆத்திரமடைந்த பொதுமக்கள், தங்கள் குடும்ப அட்டைகளைக் கிராம நிர்வாக அலுவலரின் காலடியில் போட்டுவிட்டு கிராம சபை கூட்டத்தைப் புறக்கணித்து வெளியேறினர். மேலும், அவர்கள் சாலை மறியலில் ஈடுபட முயன்றனர். அங்கு பாதுகாப்புப் பணியில் ஈடுபட்டிருந்த காவல்துறையினர் பொதுமக்களை சமாதானப்படுத்தி கலைந்து போகச் செய்தனர்.
திருப்பத்தூர் மாவட்டத்தில் மாவட்ட நிர்வாகம் இப்பகுதியில் சுடுகாடு அமைக்க அனுமதி அளித்தால், வரவிருக்கும் சட்டமன்றத் தேர்தலைப் புறக்கணிப்பதோடு, தங்கள் அடையாள ஆவணங்களை மாவட்ட நிர்வாகத்திடம் ஒப்படைப்போம் என்றும் கிராம மக்கள் எச்சரித்துள்ளனர்.