கோவை மாவட்டம் வால்பாறை அருகே உள்ள ஊசிமலை மட்டம் பகுதியில் நள்ளிரவில் புகுந்த ஏழு காட்டு யானைகள் கொண்ட கூட்டம், தொழிலாளர் ஒருவரின் வீட்டை இடித்து சேதப்படுத்திய சம்பவம் அப்பகுதியில் பெரும் அச்சத்தை ஏற்படுத்தியுள்ளது.
வால்பாறை அருகே உள்ள ஊசிமலை மட்டம் தொழிலாளர்கள் குடியிருப்பு பகுதிக்குள் நேற்று நள்ளிரவில் நுழைந்த ஏழு காட்டு யானைகள் கொண்ட கும்பல், அங்கு வசிக்கும் சமுத்திரக்கனி என்பவரின் வீட்டின் சமையலறையை உடைத்து சேதப்படுத்தியது. திடீர் சத்தம் கேட்டு விழித்தெழுந்த குடியிருப்புவாசிகள், யானைகளைக் கண்டு அதிர்ச்சியடைந்து பின்வாசல் வழியாக தப்பியோடினர்.
இதனைத் தொடர்ந்து, அப்பகுதி தொழிலாளர்கள் ஒன்றுகூடி கூச்சலிட்டனர். நீண்ட நேரப் போராட்டத்திற்குப் பின்னர் யானைகள் அங்கிருந்து வனப்பகுதிக்கு விரட்டப்பட்டன. இந்தச் சம்பவத்தில் வீட்டில் இருந்த அரிசி உள்ளிட்ட உணவுப் பொருட்களும் சமையல் பாத்திரங்களும் சேதமடைந்தன.
குடியிருப்புப் பகுதிகளில் காட்டு யானைகள் தொடர்ந்து நுழைவதைத் தடுத்து, பொதுமக்களின் பாதுகாப்பை உறுதி செய்ய வனத்துறையினர் உரிய நடவடிக்கை எடுக்க வேண்டும் என்று அப்பகுதி தொழிலாளர்களும் பொதுமக்களும் கோரிக்கை விடுத்துள்ளனர்.