பக்தி கோலத்தில் மயூரநாதர் கோயிலில் துலா உற்சவ விநாயகர் கொடியேற்றம்!

மயிலாடுதுறையில் உள்ள புகழ்பெற்ற காவிரி துலாக்கட்ட துலா உற்சவத்தை முன்னிட்டு, திருவாவடுதுறை ஆதீனத்திற்கு சொந்தமான மயூரநாதர் சுவாமி கோயிலில் விநாயகர் கொடியேற்றம் விமரிசையாக நடைபெற்றது.

புராண வரலாற்றுச் சிறப்புமிக்க ஐப்பசி மாத துலா உற்சவத்தின் ஒரு பகுதியாக, சிவாலயங்களில் உற்சவம் தொடங்குவதை குறிக்கும் வகையில் இந்த கொடியேற்றம் நடத்தப்பட்டது. கங்கை உள்ளிட்ட புண்ணிய நதிகள் ஐப்பசி மாதம் முழுவதும் காவிரி துலாக்கட்டத்தில் புனித நீராடி தங்கள் பாவங்களைப் போக்கிக் கொண்டதாக ஐதீகம் உள்ளது. இதன் அடிப்படையில், ஆண்டுதோறும் ஐப்பசி மாதம் முழுவதும் மயிலாடுதுறையில் உள்ள பல்வேறு சிவாலயங்களில் இருந்து சுவாமி புறப்பட்டு காவிரி துலாக்கட்டத்தில் தீர்த்தவாரி உற்சவம் நடைபெறுவது வழக்கம்.

இந்த ஆண்டிற்கான ஐப்பசி மாத தீர்த்தவாரி கடந்த 1ஆம் தேதி முதல் தொடங்கி நடைபெற்று வருகிறது. இந்நிலையில், கோயில்களில் பிரதான உற்சவங்கள் தொடங்குவதை உணர்த்தும் வகையில் மயூரநாதர் ஆலயத்தில் விநாயகர் கொடியேற்றம் நடைபெற்றது. இதையொட்டி, கொடிமரத்திற்கு சிறப்பு அபிஷேகங்கள் மற்றும் ஆராதனைகள் நடத்தப்பட்டு, திருக்கொடி ஏற்றப்பட்டது. அதனைத் தொடர்ந்து, பூஜிக்கப்பட்ட புனித நீரால் அபிஷேகம் செய்யப்பட்டு, பஞ்சமூர்த்திகளுக்கு மகாதீபாராதனை காண்பிக்கப்பட்டது.

வரும் 7ஆம் தேதி பெரிய கொடியேற்றம் நடைபெறவுள்ளது. தொடர்ந்து பத்தாண்டு உற்சவத்தின் முக்கிய நிகழ்வுகளான மயிலம்மன் பூஜை, திருக்கல்யாணம் மற்றும் திருத்தேர் ஓட்டம் ஆகியவை நடைபெறுகின்றன. இந்நிகழ்ச்சிகளின் நிறைவாக, வரும் 16ஆம் தேதி புகழ்பெற்ற கடைமுக தீர்த்தவாரியும், 17ஆம் தேதி முடவனுக்கு இறைவன் காட்சி தந்த முடவன் முழுக்கு திருவிழாவும் நடைபெற உள்ளது. விநாயகர் கொடியேற்ற நிகழ்வில் திரளான பக்தர்கள் கலந்துகொண்டு சுவாமி தரிசனம் செய்தனர்.