மயக்க மருந்து குறித்த அச்சத்தைப் போக்க அரியலூரில் மாநில அளவிலான சிறப்பு பயிலரங்கம்!

உலக மயக்க மருந்து தினத்தை முன்னிட்டு, அரியலூர் அரசு மருத்துவக் கல்லூரி சார்பில் மாநில அளவிலான மயக்க மருந்து விழிப்புணர்வு பயிலரங்கம் நடைபெற்றது.

ஆண்டுதோறும் அக்டோபர் 16ஆம் தேதி உலக மயக்க மருந்து தினம் கடைப்பிடிக்கப்படுகிறது. இதனை முன்னிட்டு மருத்துவக் கல்லூரிகள், மருத்துவமனைகள் மற்றும் மருத்துவச் சங்கங்கள் சார்பில் மயக்க மருந்தின் முக்கியத்துவம் மற்றும் பாதுகாப்பு குறித்து பல்வேறு விழிப்புணர்வு நிகழ்ச்சிகள் நடத்தப்படுவது வழக்கம். அதன் ஒரு பகுதியாக, அரியலூர் அரசு மருத்துவக் கல்லூரி சார்பில் தனியார் விடுதியில் இந்த மாநில அளவிலான பயிலரங்கம் ஒருங்கிணைக்கப்பட்டது.

இப்பயிலரங்கில், அறுவை சிகிச்சையின்போது நோயாளிகளின் பாதுகாப்பை உறுதி செய்யும் அதிநவீன மயக்க மருந்து கருவிகள் மற்றும் நோயாளிகளைக் கண்காணிக்கும் நவீன முறைகள் குறித்து விளக்கப்பட்டது. மேலும், பிரசவ கால வலியைக் குறைப்பதில் மயக்க மருந்து நிபுணர்களின் பங்கு, அறுவை சிகிச்சைக்குப் பிந்தைய வலி மேலாண்மை மற்றும் தீவிர சிகிச்சைப் பிரிவில் மயக்க மருந்து நிபுணர்களின் முக்கியத்துவம் குறித்தும் விரிவாக எடுத்துரைக்கப்பட்டது.

மயக்க மருந்து குறித்த பொதுமக்களின் அச்சத்தைப் போக்கி, நவீன மருத்துவ முறைகளில் மயக்க மருந்து எவ்வாறு பாதுகாப்பாகப் பயன்படுத்தப்படுகிறது என்பது குறித்தும் விழிப்புணர்வு ஏற்படுத்தப்பட்டது. இம்மாநில அளவிலான பயிலரங்கில் பல்வேறு மருத்துவக் கல்லூரிகளின் முதல்வர்கள், பேராசிரியர்கள், மருத்துவர்கள் மற்றும் மருத்துவக் கல்லூரி மாணவர்கள் உள்ளிட்ட பலர் கலந்துகொண்டனர்.