அரியலூர் மாவட்ட ஆட்சியர் அலுவலகக் கூட்டரங்கில் நடைபெற்ற மக்கள் குறைதீர்க்கும் நாள் கூட்டத்தில், மாவட்ட ஆட்சித்தலைவர் திருமதி ந. மிருணாளினி, இ.ஆ.ப., பொதுமக்களிடமிருந்து மனுக்களைப் பெற்றுக்கொண்டு, மாற்றுத்திறனாளிகளுக்கு பல்வேறு நலத்திட்ட உதவிகளை வழங்கினார்.
இக்கூட்டத்தில், முதியோர் உதவித்தொகை, இலவச வீட்டுமனைப் பட்டா, மாற்றுத்திறனாளி உதவித்தொகை, தொழில்கடன் மற்றும் பசுமை வீடு உள்ளிட்ட பல்வேறு கோரிக்கைகள் அடங்கிய 446 மனுக்கள் பொதுமக்களிடமிருந்து பெறப்பட்டன. இம்மனுக்கள் மீது உடனடியாக உரிய நடவடிக்கை எடுக்குமாறு சம்பந்தப்பட்ட துறை அலுவலர்களுக்கு மாவட்ட ஆட்சித்தலைவர் உத்தரவிட்டார்.
தொடர்ந்து, ஒருங்கிணைந்த குழந்தைகள் வளர்ச்சித் திட்டம் சார்பில், 'தூய்மை இந்தியா இயக்கம் 6.0' திட்டத்தின் கீழ் அங்கன்வாடி மையங்களைச் சிறந்த முறையில் தூய்மையாகவும் சுகாதாரமாகவும் பராமரித்த 6 அங்கன்வாடி மையங்களின் பணியாளர்கள் மற்றும் உதவியாளர்களுக்கு கேடயம் மற்றும் பாராட்டுச் சான்றிதழ்கள் வழங்கப்பட்டன.
மேலும், மாற்றுத்திறனாளிகள் நலத்துறை சார்பில், உலக மாற்றுத்திறனாளிகள் தினத்தை முன்னிட்டு நடைபெற்ற நிகழ்ச்சியில், இருவருக்கு முறையே ரூ.50,000 மற்றும் ரூ.25,000 என மொத்தம் ரூ.75,000 மதிப்பிலான திருமண உதவித்தொகை வழங்கப்பட்டது. சம்ருதி பவுண்டேசன் தொண்டு நிறுவனம் மூலம் சமூக தரவு கணக்கெடுப்பு முன்களப் பணியாளர் பணிக்கான பணி ஆணைகளும், மற்றொரு மாற்றுத்திறனாளிக்கு ஊன்றுகோலும் வழங்கப்பட்டன.
இந்நிகழ்வில் மாவட்ட வருவாய் அலுவலர் திருமதி க.ரா.மல்லிகா மற்றும் மாவட்ட நிலை அலுவலர்கள் உள்ளிட்ட அரசு அதிகாரிகள் பலர் கலந்துகொண்டனர்.