திண்டுக்கல் அருகே மனைவியை கொன்று புதைத்ததாகக் கூறி கணவன் அளித்த பரபரப்பு வாக்குமூலத்தைத் தொடர்ந்து, குறிப்பிட்ட இடத்தில் வருவாய்த்துறையினர் மற்றும் காவல்துறையினர் ஜேசிபி இயந்திரம் உதவியுடன் தீவிர தேடுதல் பணியில் ஈடுபட்டுள்ளனர்.
திண்டுக்கல் அடுத்த இரண்டலப்பாறை பகுதியைச் சேர்ந்தவர் கூலித்தொழிலாளி லாரன்ஸ் (36). இவருக்கும் கௌசல்யா என்பவருக்கும் கடந்த 6 ஆண்டுகளுக்கு முன்பு திருமணம் நடைபெற்றது. இவர்களுக்கு 5 மற்றும் 2 வயதில் இரண்டு பெண் குழந்தைகள் உள்ளனர். இதனிடையே, கௌசல்யா கடந்த சில வாரங்களாகக் காணாமல் போனதாகக் கூறப்படுகிறது.
குட்டத்துபட்டியில் வசிக்கும் தனது பெற்றோரிடம் கௌசல்யா வழக்கமாக தொலைபேசியில் பேசி வந்துள்ளார். ஆனால், சில நாட்களாக அவரிடமிருந்து எந்தத் தொடர்பும் இல்லாததால் சந்தேகம் அடைந்த பெற்றோர், இரண்டலப்பாறையில் உள்ள லாரன்ஸின் வீட்டிற்குச் சென்று விசாரித்துள்ளனர். அங்கு கௌசல்யா இல்லாததால் அதிர்ச்சியடைந்த பெற்றோர், தனது மகளைக் காணவில்லை என்றும், மருமகன் லாரன்ஸ் மீது சந்தேகம் இருப்பதாகவும் திண்டுக்கல் தாலுகா காவல் நிலையத்தில் புகார் அளித்தனர்.
புகாரின் அடிப்படையில் விசாரணை மேற்கொண்ட காவல்துறையினர், லாரன்ஸைப் பிடித்து விசாரணை நடத்தினார்கள். அப்போது, சிறுமலை அடிவாரப் பகுதியில் புதிதாக அமைக்கப்பட்டு வரும் ரிங் ரோடு பகுதியில் தனது மனைவியை கொன்று சாக்குப்பையில் கட்டி புதைத்ததாக அவர் திடுக்கிடும் தகவலைத் தெரிவித்தார்.
இதனைத் தொடர்ந்து, காவல்துறையினரும் வருவாய்த்துறையினரும் இணைந்து லாரன்ஸ் குறிப்பிட்ட இடத்தில் ஜேசிபி இயந்திரம் மூலம் உடலைத் தேடும் பணியில் தீவிரமாக ஈடுபட்டுள்ளனர். லாரன்ஸ் உண்மையாகவே மனைவியைக் கொன்று புதைத்தானா அல்லது வேறு ஏதேனும் காரணத்திற்காக நாடகம் ஆடுகிறாரா என்ற கோணத்தில் போலீசார் அவரிடம் தொடர்ந்து விசாரணை நடத்தி வருகின்றனர்.