நாமக்கல் மாவட்டம் பரமத்தி வேலூர் அருகே மதுபானம் வழங்க காலதாமதம் ஏற்பட்டதாகக் கூறி, டாஸ்மாக் கடை விற்பனையாளர்களைத் தாக்கிவிட்டுத் தப்பியோடிய மூன்று பேரை காவல்துறையினர் தேடி வருகின்றனர். இச்சம்பவத்தில் காயமடைந்த இரண்டு விற்பனையாளர்கள் அரசு மருத்துவமனையில் அனுமதிக்கப்பட்டுள்ளனர்.
பரமத்தி வேலூர் அடுத்த பில்லூர் பகுதியில் உள்ள டாஸ்மாக் கடையில் புருஷோத்தமன் விற்பனையாளராகப் பணியாற்றி வருகிறார். ஞாயிற்றுக்கிழமை என்பதால் கடையில் வழக்கத்தை விடக் கூட்டம் அதிகமாக இருந்துள்ளது. மேலும், காலி மதுபான பாட்டில்களைத் திரும்பப் பெறும் நடைமுறையிலும் சிக்கல் ஏற்பட்டுள்ளது.
இந்நிலையில், மதுபோதையில் அங்கு வந்த அடையாளம் தெரியாத மூன்று பேர், மதுபானம் வழங்குவதில் காலதாமதம் ஆவது குறித்து புருஷோத்தமனிடம் வாக்குவாதத்தில் ஈடுபட்டுள்ளனர். காலி பாட்டில்களைத் திரும்பப் பெறும்போது மூன்று முறை ஸ்கேன் செய்ய வேண்டியுள்ளதால் தாமதம் ஏற்படுவதாக அவர் விளக்கியுள்ளார். இருப்பினும், அதனை ஏற்க மறுத்த அந்த நபர்கள், புருஷோத்தமனை காலி மதுபாட்டிலால் தாக்கிவிட்டுத் தப்பியோடியுள்ளனர். காயமடைந்த அவர் பரமத்தி வேலூர் அரசு மருத்துவமனையில் அனுமதிக்கப்பட்டுள்ளார்.
இதேபோன்று, வசந்தபுரம் டாஸ்மாக் கடையில் பணியாற்றும் விற்பனையாளர் மாரிமுத்து என்பவரையும் அடையாளம் தெரியாத நபர்கள் தாக்கிவிட்டுத் தப்பியோடியுள்ளனர். காயமடைந்த மாரிமுத்துவும் அரசு மருத்துவமனையில் சிகிச்சை பெற்று வருகிறார். இந்தச் சம்பவங்கள் குறித்து ஜேடர்பாளையம் காவல்துறையினர் வழக்குப் பதிவு செய்து விசாரணை நடத்தி வருகின்றனர்.
விற்பனையாளர்கள் தாக்க1ப்பட்டதைத் தொடர்ந்து அந்த டாஸ்மாக் கடைகள் தற்காலிகமாக மூடப்பட்டன. காலி மதுபான பாட்டில்களைத் திரும்பப் பெறும் திட்டத்தில் ஸ்கேன் செய்வதால் ஏற்படும் காலதாமதமே இத்தகைய மோதல்களுக்குக் காரணம் என்பதால், இந்தத் திட்டத்தை மாற்று வழியில் செயல்படுத்த வேண்டும் என்று டாஸ்மாக் ஊழியர்கள் கோரிக்கை விடுத்துள்ளனர்.