தென்காசி மாவட்டம் கடையநல்லூர் பகுதியில் உள்ள உயர்மின் கோபுர விளக்கு கடந்த சில நாட்களாக எரியாததால், பொதுமக்கள் மற்றும் வாகன ஓட்டிகள் கடும் அவதிக்குள்ளாகி வருகின்றனர்.
கடையநல்லூர் நகரின் முக்கிய பகுதியாக விளங்கும் மணிக்கூண்டு மற்றும் அதனைச் சுற்றியுள்ள பகுதிகளில் தினசரி மாலை மற்றும் இரவு நேரங்களில் ஆயிரக்கணக்கான இருசக்கர மற்றும் நான்கு சக்கர வாகனங்கள் வந்து செல்கின்றன. இப்பகுதியில் பொருத்தப்பட்டிருந்த உயர்மின் கோபுர விளக்கு பழுதடைந்து எரியாமல் உள்ளதால், அப்பகுதியில் கடும் இருள் சூழ்ந்து காணப்படுகிறது.
இதன் காரணமாக இரவு நேரங்களில் விபத்துகள் நிகழும் அபாயம் ஏற்பட்டுள்ளதாக அப்பகுதி மக்கள் கவலை தெரிவிக்கின்றனர். எனவே, சம்பந்தப்பட்ட துறை அதிகாரிகள் உடனடியாக தலையிட்டு, பழுதடைந்த உயர்மின் கோபுர விளக்கை விரைந்து சரிசெய்து பயன்பாட்டுக்கு கொண்டுவர வேண்டும் என்பதே பொதுமக்களின் முக்கிய கோரிக்கையாக உள்ளது.