தமிழகத்தில் வடகிழக்கு பருவமழை தொடங்கியுள்ள நிலையில், 2026-27ஆம் நிதியாண்டுக்கான கால்நடை காப்பீடு பிரீமியம் செலுத்துவது குறித்த அறிவிப்பை விரைவாக வெளியிட வேண்டும் என திருவாரூர் மாவட்ட கால்நடை வளர்ப்போர் மற்றும் விவசாயிகள் கோரிக்கை விடுத்துள்ளனர்.
திருவாரூர் மாவட்டத்தில் கிராமப்புற மக்களின் வாழ்வாதாரத்திற்கு கறவை மாடுகள் உள்ளிட்ட கால்நடைகள் முக்கிய பங்கு வகிக்கின்றன. பருவமழை காலங்களில் ஏற்படும் பேரிடர்கள் மற்றும் எதிர்பாராத உயிரிழப்புகளிலிருந்து விவசாயிகளைப் பாதுகாக்க மத்திய, மாநில அரசுகள் சார்பில் கால்நடை காப்பீட்டுத் திட்டம் செயல்படுத்தப்பட்டு வருகிறது. நடப்பாண்டில் பருவமழை தொடங்கியுள்ள போதிலும், காப்பீட்டுக்கான பிரீமியம் தொகை குறித்த அதிகாரப்பூர்வ அறிவிப்பு இதுவரை வெளியாகவில்லை என விவசாயிகள் கவலை தெரிவித்துள்ளனர்.
இதுகுறித்து நன்னிலம் பகுதி விவசாயி முகேஷ் கூறுகையில், கடந்த ஆண்டு ஜூன் மற்றும் ஜூலை மாதங்களிலேயே காப்பீட்டுத் திட்டம் குறித்த அறிவிப்பு வெளியிடப்பட்டதாகவும், ஆனால் நடப்பாண்டில் அக்டோபர் மாதம் நிறைவடைய உள்ள நிலையிலும் இதுவரை அறிவிப்பு வெளியாகவில்லை எனவும் தெரிவித்தார். மேலும், கால்நடை காப்பீடு குறித்த விழிப்புணர்வு விவசாயிகள் மத்தியில் குறைவாக உள்ளதாகவும், கடந்த ஆண்டு திருவாரூர் மாவட்டத்தில் 280 விவசாயிகள் மட்டுமே தங்களது கால்நடைகளுக்கு காப்பீடு செய்துள்ளதாகவும் அவர் குறிப்பிட்டார்.
இதனிடையே, நடப்பு நிதியாண்டில் திருவாரூர் மாவட்டத்தில் 2 லட்சத்துக்கும் மேற்பட்ட கால்நடைகளுக்கு காப்பீடு செய்ய இலக்கு நிர்ணயிக்கப்பட்டுள்ளதாகக் கால்நடைத்துறை அதிகாரிகள் தெரிவித்துள்ளனர். தமிழகம் முழுவதும் இத்திட்டத்திற்காக 31 கோடி ரூபாய் ஒதுக்கப்பட்டுள்ளதாகவும், விவசாயிகளுக்கான பிரீமியம் செலுத்தும் முறை குறித்த வழிகாட்டுதல்கள் இன்னும் ஓரிரு நாட்களில் வெளியிடப்படும் என்றும் துறைசார் அதிகாரிகள் உறுதியளித்துள்ளனர்.