தமிழ்நாடு அரசு சுகாதாரத் துறையில் பதவி உயர்வு வழங்குவதில் பாகுபாடு காட்டுவதாகக் கூறி, கிராமப் பகுதி சமுதாய சுகாதார செவிலியர்கள் கூட்டமைப்பின் சார்பில் நாமக்கல் மாவட்ட ஆட்சியர் அலுவலக நுழைவு வாயில் முன்பு கடந்த நவம்பர் 3 ஆம் தேதி கண்டன ஆர்ப்பாட்டம் நடைபெற்றது.
கூட்டமைப்பின் மாவட்டத் தலைவர் கற்பகம் தலைமையில் நடைபெற்ற இந்த ஆர்ப்பாட்டத்தில், துணை சுகாதார நிலையத்திலிருந்து இடைநிலை சுகாதார பணியாளரை அப்புறப்படுத்த வேண்டும் என்று வலியுறுத்தப்பட்டது. தமிழகத்தில் சுகாதாரத் துறையில் 40 ஆண்டுகளாக நடைமுறையில் உள்ள VHN, SHN, CHN, வட்டார மருத்துவர், CHO, DHO என்ற கட்டமைப்பைச் சீர்குலைக்கும் வகையில் இடைநிலை சுகாதார பணியாளர்களுக்கு அந்தப் பெயரை வழங்குவதைத் தவிர்க்க வேண்டும் எனக் கோரப்பட்டது.
மேலும், கிராம சுகாதார செவிலியர்களுக்குப் பணிமூப்புப் பட்டியல் மதிப்பெண் அடிப்படையில் பதிவு போடப்பட்டிருப்பதால், உரிய மதிப்பெண்களுடன் பணிமூப்புப் பட்டியலை வழங்க வேண்டும், சுகாதார செவிலியர்களுக்குப் பதவி உயர்வு வழங்குவதில் நிலவும் பாகுபாடுகளைக் களைய வேண்டும் என்பன உள்ளிட்ட 10 அம்ச கோரிக்கைகள் வலியுறுத்தப்பட்டன.
இந்த ஆர்ப்பாட்டத்தில் நாமக்கல் மாவட்டம் முழுவதிலுமிருந்து கூட்டமைப்பைச் சேர்ந்த 30-க்கும் மேற்பட்ட சுகாதார செவிலியர்கள் பங்கேற்று அரசுக்கு எதிராகக் கண்டன முழக்கங்களை எழுப்பினர்.