மயிலாடுதுறை மாவட்டத்தில் புதிதாக நியமிக்கப்பட்ட விடுதலை சிறுத்தைகள் கட்சிப் பொறுப்பாளர்கள், அண்ணல் அம்பேத்கர் மற்றும் பெரியார் சிலைகளுக்கு ஊர்வலமாகச் சென்று மாலை அணிவித்து மரியாதை செலுத்தினர்.
மயிலாடுதுறை கிட்டப்பா அங்காடி பகுதியில் இருந்து விசிக மாவட்டச் செயலாளர் மோகன்குமார் தலைமையில், கட்சி நிர்வாகிகள் மற்றும் தொண்டர்கள் கொடிகளை ஏந்தி பேரணியாகச் சென்றனர். அவர்கள் அரசுப் போக்குவரத்துக் கழக பணிமனை முன்பு அமைந்துள்ள அண்ணல் அம்பேத்கரின் உருவச்சிலைக்கு மாலை அணிவித்தனர். அதனைத் தொடர்ந்து, கண்ணாரத் தெருவில் உள்ள பெரியார் திருவுருவச் சிலைக்கு மாலை அணிவித்து மரியாதை செலுத்தினர்.
இந்த நிகழ்வின்போது, மயிலாடுதுறை நகராட்சிக்கு ரிசர்வ் அந்தஸ்து வழங்க வேண்டும், மீத்தேன் திட்டத்தை ரத்து செய்ய வேண்டும், தேர்தல் ஆணையர் ஞானேஷ்குமார் பதவி நீக்கம் செய்யப்பட வேண்டும், ஒப்பந்த அடிப்படையில் பணிபுரியும் தூய்மைப் பணியாளர்களுக்கு நிலுவையில் உள்ள ஊதியம் மற்றும் போனஸ் தொகையை உடனே வழங்க வேண்டும் என்பன உள்ளிட்ட பல்வேறு கோரிக்கைகளை வலியுறுத்தி முழக்கங்கள் எழுப்பப்பட்டன. இதில் மாநில, மாவட்ட, ஒன்றிய, நகர மற்றும் பேரூர் அளவிலான விசிக நிர்வாகிகளும் தொண்டர்களும் திரளாகக் கலந்துகொண்டனர்.