விருதுநகர் நகராட்சி சாலையில் உள்ள தனியார் வாகனக் காப்பகத்தில் ஏற்பட்ட பயங்கர தீ விபத்தில் 8 கார்கள் மற்றும் ஒரு சரக்கு வாகனம் முற்றிலும் எரிந்து சேதமடைந்தன.
விருதுநகர் நகராட்சி சாலையில், அதிமுக நகரச் செயலாளர் வெங்கடேஷ் என்பவருக்குச் சொந்தமான தனியார் வாகனக் காப்பகம் செயல்பட்டு வருகிறது. இந்நிலையில், இன்று அதிகாலை சுமார் 2 மணியளவில் இக்காப்பகத்தில் எதிர்பாராதவிதமாகத் திடீரெனத் தீப்பற்றியது. தீ மளமளவெனப் பரவி அங்கு நிறுத்தப்பட்டிருந்த வாகனங்களை நோக்கி எரிந்தது.
இச்சம்பவம் குறித்துத் தகவல் அறிந்ததும், விருதுநகர் தீயணைப்பு நிலையத்திலிருந்து 4 வாகனங்களில் விரைந்து வந்த தீயணைப்பு வீரர்கள், சுமார் ஒரு மணி நேரம் போராடித் தீயைக் கட்டுக்குள் கொண்டுவந்தனர். தீயணைப்பு வீரர்களின் விரைவான நடவடிக்கையால், அங்கு நிறுத்தப்பட்டிருந்த மற்ற 20-க்கும் மேற்பட்ட கார்கள் தீயில் சிக்காமல் தப்பியது குறிப்பிடத்தக்கது.
இந்தத் தீ விபத்தில் 8 கார்கள் மற்றும் ஒரு டாட்டா ஏஸ் சரக்கு வாகனம் உள்பட மொத்தம் 9 வாகனங்கள் முற்றிலுமாக எரிந்து சாம்பலாகின. மின் கசிவு காரணமாக இந்த விபத்து நேர்ந்ததா அல்லது வேறு ஏதேனும் காரணங்கள் உள்ளதா என்பது குறித்து விருதுநகர் பஜார் காவல் நிலையப் போலீசார் வழக்குப்பதிவு செய்து தீவிர விசாரணை மேற்கொண்டு வருகின்றனர்.