விருதுநகர் மாவட்டம், ஸ்ரீவில்லிபுத்தூர் மற்றும் சுற்றுவட்டாரப் பகுதிகளில் நீர்வரத்துக் கால்வாய்களைத் தூர்வாரவும், 250 ஏக்கர் பரப்பளவில் அமைந்துள்ள பெரியகுளம் கண்மாயை ஆக்கிரமித்துள்ள சீமை கருவேல மரங்களை அகற்றவும் விவசாயிகள் கோரிக்கை விடுத்துள்ளனர்.
மேற்குத் தொடர்ச்சி மலை அடிவாரத்தில் அமைந்துள்ள இப்பகுதியில் விவசாயம் முதன்மைத் தொழிலாக விளங்கி வருகிறது. கடந்த 10 நாட்களாகப் பெய்துவரும் தொடர் மழை காரணமாக, இப்பகுதி விவசாய நிலங்களின் நீராதாரமான பிளவக்கல் பெரியார் மற்றும் கோலாறு அணைகளுக்கு நீர்வரத்து அதிகரித்துள்ளது. அடுத்த மாதம் விவசாயப் பாசனத்திற்காக இவ்விரு அணைகளும் முழு கொள்ளளவை எட்டித் திறக்கப்பட வாய்ப்புள்ளது.
பிளவக்கல் பெரியார் அணையிலிருந்து திறக்கப்படும் நீரானது வத்திராயிருப்பு வழியாகச் சுந்தரபாண்டியம் பெரியகுளம் கண்மாய்க்கு வந்து சேர வேண்டும். ஆனால், வத்திராயிருப்பில் அமைந்துள்ள திருத்தங்கள் தடுப்பணையின் உயரம் குறைவாக இருப்பதால், பாசன நீர் கடைமடைப் பகுதி வரை முழுமையாகச் செல்வதில்லை என விவசாயிகள் தெரிவிக்கின்றனர். மேலும், கால்வாய்கள் தூர்வாரப்படாததும், கண்மாயை சீமை கருவேல மரங்கள் ஆக்கிரமித்திருப்பதும் நீர் வரத்தைத் தடை செய்வதாக அவர்கள் குற்றம்சாட்டுகின்றனர்.
இதனால் சுந்தரபாண்டியம், துலுக்கப்பட்டி, காடனேரி உள்ளிட்ட கிராமங்களில் உள்ள 500 ஏக்கருக்கும் மேற்பட்ட விவசாய நிலங்கள் பாதிக்கப்பட்டுள்ளதாக விவசாயிகள் கவலை தெரிவிக்கின்றனர். கடந்த 25 ஆண்டுகளாக விடுக்கப்பட்டுவரும் இக்கோரிக்கையை ஏற்று, தடுப்பணையின் உயரத்தை அதிகரிக்கவும், நீர்வரத்துக் கால்வாய்களைத் தூர்வாரவும், சீமை கருவேல மரங்களை அகற்றவும் மாவட்ட நிர்வாகம் உடனடியாக நடவடிக்கை எடுக்க வேண்டும் என விவசாயி சுப்புராஜ் வலியுறுத்தியுள்ளார்.