விருதுநகர் மாவட்டத்தில் இரத்த வங்கிகளின் செயல்திறனை உயர்த்த ஆட்சியர் விடுத்த உத்தரவுகள் என்ன?

விருதுநகர் மாவட்ட ஆட்சியர் அலுவலக கூட்டரங்கில், மாவட்ட ஆட்சித்தலைவர் திருமதி ஷரண்யா அறி தலைமையில் மாவட்ட இரத்தப் பரிமாற்றக் குழுக் கூட்டம் (DBTC) நடைபெற்றது.

இக்கூட்டத்தில் இரத்த வங்கிகளின் செயல்பாடுகள் மற்றும் 10 முக்கிய செயல்திறன் குறியீடுகள் குறித்து விரிவாக ஆய்வு செய்யப்பட்டது. அப்போது பேசிய மாவட்ட ஆட்சித்தலைவர் திருமதி ஷரண்யா அறி, முக்கிய செயல்திறன் குறியீட்டு மதிப்பீடு என்பது தனிப்பட்ட இரத்த வங்கியின் செயல்பாடு மட்டுமல்லாமல், அரசு மற்றும் தனியார் இரத்த வங்கிகளின் ஒட்டுமொத்த செயல்திறனைக் குறிப்பதாகத் தெரிவித்தார். எனவே, அனைத்து இரத்த வங்கிகளும் ஒருங்கிணைந்து செயல்பட்டு மாவட்டத்தின் இலக்குகளை அடைய வேண்டும் என்றார்.

மேலும் கூட்டத்தில் விவாதிக்கப்பட்ட முக்கிய வழிகாட்டுதல்கள்:

• தேசிய இரத்த பரிமாற்றக் குழுக்கள் தன்னார்வ இரத்ததான முகாம்களை அதிக அளவில் நடத்தி இரத்த சேகரிப்பை அதிகரிக்க வேண்டும்.
• தர உறுதிப்பாட்டு திட்டத்தில் இணையாத தனியார் இரத்த வங்கிகள் உடனடியாகப் பதிவு செய்து, முறையான அறிக்கைகளைப் பராமரிக்க வேண்டும்.
• இரத்தக் கூறுகளைத் தேவையான இடங்களுக்கு விநியோகிக்க 'Hub-and-Spoke' முறையைத் தொடர்ந்து செயல்படுத்த வேண்டும்.
• ஆயுஷ்மான் பாரத் டிஜிட்டல் மிஷன் (ADMS) மற்றும் இரத்த வங்கி மேலாண்மை அமைப்புகளில் (BBMS) ஆதார் அடிப்படையிலான பதிவுகளை முழுமையாகச் செயல்படுத்த வேண்டும்.
• இரத்த வங்கி உரிமத்தைக்காலாவதியாகும் தேதிக்கு குறைந்தது 3 மாதங்களுக்கு முன்பே புதுப்பிக்க வேண்டும்.
• இ-ரத்தகோஷ் (e-RaktKosh) தளத்தில் தினசரி இரத்த இருப்பைப் பதிவு செய்வதோடு, இரத்தப் பாதுகாப்பு கண்காணிப்பு திட்டத்தில் (HvPI) பதிவு செய்ய வேண்டும்.

அனைத்து அரசு மற்றும் தனியார் இரத்த வங்கிகளும் தங்களது குறைகளை நிவர்த்தி செய்து, மாவட்டத்தின் ஒட்டுமொத்த முக்கிய குறியீட்டு மதிப்பெண்ணை 100/100 ஆக உயர்த்துவதே அனைவரின் பொதுவான இலக்காக இருக்க வேண்டும் என மாவட்ட ஆட்சித்தலைவர் அறிவுறுத்தினார்.