வேலூர் மாவட்டம் குடியாத்தத்தில் செய்தியாளர்களை சந்தித்த பாஜக மூத்த தலைவரும், முன்னாள் ஆளுநருமான டாக்டர் தமிழிசை சௌந்தரராஜன், தீபாவளிக்குள் ஆவின் பொருட்களின் விலையைக் குறைக்க வேண்டும் என்று வலியுறுத்தியுள்ளார்.
குடியாத்தம் அடுத்த காக்கா தோப்பு பகுதியில் உள்ள அத்தி இயற்கை மற்றும் யோகா மருத்துவக் கல்லூரியில் நடைபெற்ற நிகழ்ச்சியில் பங்கேற்ற பின் செய்தியாளர்களைச் சந்தித்த அவர் கூறியதாவது "மக்களின் பணத்தை திமுக அரசு எப்படியெல்லாம் சுரண்டியது என்பதற்கு முன்னாள் அமைச்சர் அன்பில் கைது செய்யப்பட்டுள்ளதே உதாரணம். தவறு செய்தவர்கள் யாராக இருந்தாலும் கைது செய்யப்பட வேண்டும்," என்றார்.
மேலும், தமிழகத்தில் மின் கட்டணம் அதிகமாக உள்ளதாகவும், தமிழக மக்களைக் கைவிடாமல் மின் துறை உடனடியாக நடவடிக்கை எடுக்க வேண்டும் என்றும் அவர் கேட்டுக் கொண்டார். வரவிருக்கும் உள்ளாட்சித் தேர்தலில் பாஜக போட்டியிட்டு பல இடங்களில் வெற்றி பெறும் என்றும், தமிழகத்தில் மோடியின் ஆட்சி எதிரொலிக்கும் என்றும் தமிழிசை சௌந்தரராஜன் தெரிவித்தார்.