திருச்சி மாவட்டம் முசிறி அருகே வேன் மரத்தில் மோதிய விபத்தில் உயிரிழந்தவர்களின் எண்ணிக்கை 8 ஆக அதிகரித்துள்ளது. தஞ்சாவூர் மாவட்டம் திருக்காட்டுப்பள்ளி பகுதியைச் சேர்ந்த செங்கல் சூளைத் தொழிலாளர்கள் 10 பேர், நாமக்கல் மாவட்டத்தில் நடைபெற்ற காதணி விழாவில் பங்கேற்பதற்காக மாருதி ஈகோ வேனில் சென்றிருந்தனர்.
விழா முடிந்து சொந்த ஊரான திருக்காட்டுப்பள்ளிக்குத் திரும்பிக் கொண்டிருந்தபோது, துறையூர் - முசிறி சாலையில் ஜம்புநாதபுரம் அருகே வேன் வந்து கொண்டிருந்தது. அப்போது எதிர்பாராதவிதமாக ஓட்டுநரின் கட்டுப்பாட்டை இழந்த வேன், சாலையோரம் இருந்த வேப்ப மரத்தின் மீது அதிவேகமாக மோதியது.
இந்த கோர விபத்தில் வேனில் பயணித்த பாவாடை, மாணிக்கம், ராஜேஷ், முருகன், சங்கிலி ஆகிய 5 பேரும் சம்பவ இடத்திலேயே உயிரிழந்தனர். தகவலறிந்து விரைந்து வந்த ஜம்புநாதபுரம் காவல்துறையினர் மற்றும் மீட்புக்குழுவினர், படுகாயமடைந்த 5 பேரை மீட்டு திருச்சி அரசு மருத்துவமனைக்கு அனுப்பி வைத்தனர்.
இந்நிலையில், மருத்துவமனையில் தீவிர சிகிச்சை பெற்று வந்த சக்திவேல், சுப்பிரமணி, சீதாராமன் ஆகிய 3 பேரும் சிகிச்சை பலனின்றி உயிரிழந்தனர். இதனால் பலி எண்ணிக்கை 8 ஆக உயர்ந்துள்ளது. விபத்து குறித்து ஜம்புநாதபுரம் காவல்துறையினர் வழக்குப் பதிவு செய்து விசாரணை நடத்தி வருகின்றனர்.









