திருநெல்வேலி டவுன் பகுதியில் அமைந்துள்ள நயினார் குளத்தில், நீண்ட நாள் கோரிக்கையான படகு சவாரி இன்று அதிகாரப்பூர்வமாகத் தொடங்கப்பட்டது. தமிழ்நாடு சுற்றுலா வளர்ச்சிக் கழகத்தின் சார்பில் தனியார் பங்களிப்புடன் செயல்படுத்தப்பட்டுள்ள இந்தத் திட்டத்தை, சுற்றுலாத்துறை அமைச்சர் ராஜேஷ்குமார் தொடங்கி வைத்தார்.
இந்த நிகழ்வில் மாவட்ட ஆட்சியர் மற்றும் சட்டமன்ற உறுப்பினர்கள் கலந்துகொண்டு படகு சவாரியைப் பார்வையிட்டனர். தற்போது ஒரு பெரிய படகு மற்றும் நான்கு சிறிய படகுகள் என மொத்தம் ஐந்து படகுகள் காலை 10 மணி முதல் மாலை 6 மணி வரை இயக்கப்பட உள்ளன. இதற்கான கட்டண விவரங்கள் விரைவில் அறிவிக்கப்படும் என எதிர்பார்க்கப்படுகிறது.
நிகழ்ச்சியில் செய்தியாளர்களிடம் பேசிய அமைச்சர் ராஜேஷ்குமார், தாமிரபரணி ஆற்றில் படகு சவாரி தொடங்குவதற்கான அரசாணை ஓரிரு நாட்களில் வெளியிடப்படும் எனத் தெரிவித்தார்.
இந்தத் திட்டத்திற்குப் பொதுமக்கள் வரவேற்பு தெரிவித்துள்ள அதே வேளையில், சுற்றுச்சூழல் ஆர்வலர்கள் மற்றும் விவசாயிகள் கவலை தெரிவித்துள்ளனர். குறிப்பாக, குளத்தில் உள்ள பறவைகளுக்கு இடையூறு ஏற்படாத வகையில் மின்சாரப் படகுகளை மட்டுமே பயன்படுத்த வேண்டும் எனப் பொதுமக்கள் கோரிக்கை விடுத்துள்ளனர். அதேசமயம், படகு சவாரியால் பாசன வசதி பாதிக்கப்படும் மற்றும் நீர்நிலை மாசுபடும் எனக் கூறி, விவசாய சங்கத்தினர் இந்தத் திட்டத்திற்குத் கடும் எதிர்ப்பு தெரிவித்துள்ளனர். இந்த விவகாரம் குறித்து முதலமைச்சரிடம் முறையிடப் போவதாகவும் அவர்கள் அறிவித்துள்ளனர்.









