திருநெல்வேலி: குழந்தைகள் தினத்தை முன்னிட்டு, தமிழக வெற்றிக் கழகத்தின் (தவெக) திருநெல்வேலி மத்திய மாவட்டம் சார்பில், பள்ளி மாணவர்களுக்கு கல்வி உபகரணங்கள் மற்றும் நலத்திட்ட உதவிகள் வழங்கும் விழா இன்று சிறப்பாக நடைபெற்றது.
பாளையங்கோட்டை தெற்கு பஜாரில் உள்ள சி.எம்.எஸ். அஸ்போர்ன் நினைவு நடுநிலைப் பள்ளியில் நடைபெற்ற இந்நிகழ்ச்சிக்கு, திருநெல்வேலி மத்திய மாவட்ட தவெக மாணவரணி அமைப்பாளர் அமீர்கான் தலைமை தாங்கினார். விழாவில் சிறப்பு விருந்தினராகக் கலந்துகொண்ட தமிழக வெற்றிக் கழகத்தின் மாநில துணைப் பொதுச் செயலாளர் ராஜகோபால், பள்ளியில் பயிலும் 75 மாணவ, மாணவிகளுக்குத் தேவையான எழுதுபொருட்கள் (ஸ்டேஷனரி கிட்), மழைக்கோட்டுகள் மற்றும் கேக்குகளை வழங்கி, தனது குழந்தைகள் தின வாழ்த்துகளைத் தெரிவித்தார்.
இந்த நிகழ்ச்சியில் திருநெல்வேலி வடக்கு மாவட்ட தொண்டரணி அமைப்பாளர் பிரதீப், மத்திய மாவட்ட இளைஞரணி அமைப்பாளர் புல்லட் ராஜா, பாளையங்கோட்டை பகுதி செயலாளர்கள் பிரபு, கந்தன், வட்டச் செயலாளர்கள் மாரி, மாரி சுடர், சண்முகசுந்தர் ஆகியோர் முன்னிலை வகித்தனர். மேலும், தவெக-வின் பல்வேறு அணி நிர்வாகிகள் மற்றும் தொண்டர்கள் திரளாகக் கலந்துகொண்டு நிகழ்ச்சியைச் சிறப்பித்தனர். கல்வி உபகரணங்கள் மற்றும் மழைக்கோட்டுகளைப் பெற்ற மாணவர்கள் மிகுந்த மகிழ்ச்சி அடைந்தனர்.









