ராமநாதபுரம் மாவட்டத்தில் குழந்தைகள் தினத்தை முன்னிட்டு மாணவர்களுக்கு வழங்கப்படவுள்ள கேக்குகளின் தரத்தை, தொழிலாளர் நலத்துறை ஆணையரும், மாவட்டக் கண்காணிப்பு அலுவலருமான டாக்டர் வள்ளலார் நேரில் ஆய்வு செய்தார்.
நவம்பர் 14-ம் தேதி குழந்தைகள் தினத்தை முன்னிட்டு, மாவட்டம் முழுவதும் உள்ள அரசு மற்றும் அரசு உதவி பெறும் பள்ளிகளில் பயிலும் மாணவ, மாணவிகளுக்கு கேக்குகள் வழங்கப்பட உள்ளன. இதற்கான ஏற்பாடுகளை ஆய்வு செய்யும் நோக்கில், பரமக்குடி அரசு பெண்கள் மேல்நிலைப்பள்ளி, சத்திரக்குடி அரசு மேல்நிலைப்பள்ளி, பட்டினம் காத்தான் ஊராட்சி ஒன்றிய நடுநிலைப்பள்ளி, மண்டபம் கேம்ப் அரசு மேல்நிலைப்பள்ளி மற்றும் ராமேஸ்வரம் அரசு பெண்கள் மேல்நிலைப்பள்ளி ஆகிய இடங்களுக்கு டாக்டர் வள்ளலார் நேரில் சென்றார்.
ஆய்வின் போது, மாணவர்களுக்கு வழங்கப்படவுள்ள கேக்குகளின் தரம் மற்றும் பாதுகாப்பு குறித்து அவர் விரிவாகக் கேட்டறிந்தார். தரமான உணவுப் பொருட்களை மாணவர்களுக்கு வழங்குவதை உறுதி செய்ய வேண்டும் என அதிகாரிகளுக்கு அவர் அறிவுறுத்தினார்.









