திருச்சி மாவட்ட நிர்வாகம் மற்றும் மாவட்ட முன்னோடி வங்கி இணைந்து நடத்திய முதற்கட்ட கல்விக் கடன் முகாம், மாவட்ட ஆட்சியர் அலுவலகக் கூட்டரங்கில் சிறப்பாக நடைபெற்றது.
மாவட்ட ஆட்சியர் பிரத்திக் தாயள் தலைமையில் நடைபெற்ற இந்நிகழ்ச்சியில், உயர்கல்வி பயிலும் 29 மாணவ, மாணவிகளுக்கு ரூ.2.65 கோடி மதிப்பிலான கல்விக் கடனுக்கான காசோலைகள் வழங்கப்பட்டு, அவர்களின் எதிர்கால கல்விப் பயணத்திற்கு வாழ்த்துகள் தெரிவிக்கப்பட்டது.
நடப்பு 2026–2027-ஆம் நிதியாண்டில் திருச்சி மாவட்டத்திற்கு மொத்தம் ரூ.140 கோடி கல்விக் கடன் வழங்க இலக்கு நிர்ணயிக்கப்பட்டுள்ளது. இதில் கடந்த செப்டம்பர் 26-ஆம் தேதி வரை பல்வேறு வங்கிகள் மூலமாக மட்டும் ரூ.70.50 கோடி கல்விக் கடன் மாணவர்களுக்கு வழங்கப்பட்டுள்ளது குறிப்பிடத்தக்கது. மேலும், கடந்த ஜூன் மாதம் வரையிலான புள்ளிவிவரங்களின்படி, கல்விக் கடன் வழங்குவதில் திருச்சி மாவட்டம் மாநில அளவில் 4-வது இடத்தைப் பிடித்து சாதனை படைத்துள்ளது.
இந்த முகாமில், உதவி ஆட்சியர் (பயிற்சி) ராகுல் ராகவன், இந்தியன் ஓவர்சீஸ் வங்கியின் துணைப் பொது மேலாளர் சதீஷ்குமார், மாவட்ட முன்னோடி வங்கி மேலாளர் வெங்கடேஸ்வரன் மற்றும் பல்வேறு வங்கி ஒருங்கிணைப்பாளர்கள் உள்ளிட்ட பலரும் உடனிருந்து சிறப்பித்தனர்.









