கரூர் தாந்தோணிமலையில் உள்ள மாவட்ட விளையாட்டு அரங்கத்தில், பேரறிஞர் அண்ணா பிறந்தநாளை முன்னிட்டு நடைபெற்ற நெடுந்தூர ஓட்டப் போட்டியை மாவட்ட ஆட்சியர் மற்றும் சட்டமன்ற உறுப்பினர் ஆகியோர் கொடியசைத்து தொடங்கி வைத்தனர்.
கரூர் மாவட்ட விளையாட்டு அரங்கத்தில் நடைபெற்ற இந்நிகழ்ச்சிக்கு மாவட்ட ஆட்சியர் பிரசன்னா ராமசாமி மற்றும் கிருஷ்ணராயபுரம் சட்டமன்ற உறுப்பினர் சத்யா ஆகியோர் தலைமை தாங்கி, ஓட்டப் போட்டியைத் தொடங்கி வைத்தனர்.
இந்தப் போட்டியில் பல்வேறு பிரிவுகளின் கீழ் வீரர், வீராங்கனைகள் பங்கேற்றனர். அதன்படி, 17 முதல் 25 வயதுக்கு உட்பட்ட ஆண்களுக்கு 8 கிலோமீட்டர் தூரமும், பெண்களுக்கு 5 கிலோமீட்டர் தூரமும் ஓடும் போட்டி நடத்தப்பட்டது. மேலும், 25 வயதுக்கு மேற்பட்ட ஆண்களுக்கு 10 கிலோமீட்டரும், பெண்களுக்கு 5 கிலோமீட்டரும் என நெடுந்தூர ஓட்டப் போட்டி விறுவிறுப்பாக நடைபெற்றது.
போட்டியில் வெற்றி பெற்ற விளையாட்டு வீரர்களுக்கு பரிசுகள் வழங்கப்பட்டன. இதன்படி, முதல் பரிசாக ரூ.5,000 வீதம் 4 பேருக்கும், இரண்டாவது பரிசாக ரூ.3,000 வீதம் 4 பேருக்கும், மூன்றாவது பரிசாக ரூ.2,000 வீதம் 4 பேருக்கும் வழங்கப்பட்டது. மேலும், 4 முதல் 10 இடங்களை பிடித்த வீரர்களுக்கு தலா ரூ.1,000 வீதம் மொத்தம் 28 நபர்களுக்கு பரிசுத் தொகையும், சான்றிதழ்களும் வழங்கி கவுரவிக்கப்பட்டனர்.









