தஞ்சாவூர்: தஞ்சாவூர் மாவட்டம் நடுக்காவேரி அருகே கார் மோதி இருசக்கர வாகனம் விபத்துக்குள்ளானதில், தாய் மற்றும் அவரது இரண்டு குழந்தைகள் சம்பவ இடத்திலேயே பரிதாபமாக உயிரிழந்தனர். இந்த கோர விபத்தில் மற்றொரு சிறுவன் படுகாயமடைந்து மருத்துவமனையில் சிகிச்சை பெற்று வருகிறான்.
கண்டியூரைச் சேர்ந்த பெனாசிர் பேகம் (29), ஞாயிற்றுக்கிழமை காலை தனது மூன்று குழந்தைகளுடன் இருசக்கர வாகனத்தில் உறவினர் வீட்டிற்குச் சென்று கொண்டிருந்தார். அவர்கள் நடுக்காவேரி காவல் நிலைய எல்லைக்குட்பட்ட அம்மன்பேட்டை பிள்ளையார் கோவில் அருகே சென்றபோது, பின்னால் அதிவேகமாக வந்த கார், அவர்கள் சென்ற இருசக்கர வாகனத்தின் மீது மோதியது.
இந்த மோதலில் நிலைதடுமாறிய இருசக்கர வாகனம், எதிரே வந்த சரக்கு வாகனத்தின் மீது நேருக்கு நேர் மோதியது. இதில் பெனாசிர் பேகம், முகமது ஜாசித் (11 மாதம்) மற்றும் முகமது ஹாலித் (4) ஆகிய மூவரும் சம்பவ இடத்திலேயே உயிரிழந்தனர். உடன் பயணம் செய்த முகமது ஜாவித் (12) பலத்த காயங்களுடன் மீட்கப்பட்டு, தஞ்சாவூர் மருத்துவக் கல்லூரி மருத்துவமனையில் தீவிர சிகிச்சை பெற்று வருகிறான்.
தகவலறிந்து சம்பவ இடத்திற்கு விரைந்த நடுக்காவேரி காவல்துறையினர், உயிரிழந்தவர்களின் உடல்களை மீட்டு உடற்கூறு ஆய்வுக்காக திருவையாறு அரசு மருத்துவமனைக்கு அனுப்பி வைத்தனர். விபத்தை ஏற்படுத்திய கார் மற்றும் சரக்கு வாகனம் குறித்து காவல்துறையினர் தீவிர விசாரணை நடத்தி வருகின்றனர்.









