தமிழ்நாடு விளையாட்டு மேம்பாட்டு ஆணையத்தின் சார்பில், திருவாரூர் மாவட்ட அளவிலான பேரறிஞர் அண்ணா பிறந்தநாள் மாரத்தான் போட்டி கோலாகலமாக நடைபெற்றது. இப்போட்டியில் 17 முதல் 25 வயது வரையிலான பிரிவினர் மற்றும் 25 வயதுக்கு மேற்பட்டவர்கள் என இரு பிரிவுகளின் கீழ் ஆண்கள் மற்றும் பெண்களுக்கு தனித்தனியாகப் போட்டிகள் நடத்தப்பட்டன.
திருவாரூர் நகராட்சி அலுவலகம் எதிரில் நடைபெற்ற தொடக்க விழாவில், கோட்டாட்சியர் கலைவாணி கொடியசைத்து மாரத்தான் போட்டியைத் தொடங்கி வைத்தார். நகராட்சி அலுவலகம் எதிரில் தொடங்கிய இந்தப் போட்டியானது, தெற்கு வீதி, கீழ வீதி, வடக்கு வீதி உள்ளிட்ட திருவாரூரின் முக்கிய வீதிகள் வழியாக மூன்று சுற்றுகளாக வெற்றிகரமாக நடத்தப்பட்டது.
இந்த மாரத்தான் போட்டியில் ஏராளமான மாணவ, மாணவிகள் மற்றும் விளையாட்டு வீரர்கள், வீராங்கனைகள் மிகுந்த ஆர்வத்துடன் கலந்துகொண்டு உற்சாகமாக ஓடினர். போட்டியில் வெற்றி பெற்றவர்களுக்கு முதல் பரிசாக ரூ.5,000, இரண்டாம் பரிசாக ரூ.3,000 மற்றும் மூன்றாம் பரிசாக ரூ.2,000 ரொக்கப் பரிசு வழங்கப்பட்டது. மேலும், 4 முதல் 10-ஆம் இடம் வரை பிடித்தவர்களுக்கு தலா ரூ.1,000 சிறப்புப் பரிசுத்தொகை வழங்கப்பட்டது.
போட்டியின் நிறைவு விழாவில், மாவட்ட விளையாட்டு அலுவலர் குமரன் கலந்துகொண்டு வெற்றி பெற்ற வீரர், வீராங்கனைகளுக்கு சான்றிதழ்கள் மற்றும் பரிசுகளை வழங்கிச் சிறப்பித்தார். இந்த மாரத்தான் நிகழ்வு திருவாரூர் மாவட்டத்தில் விளையாட்டுத் துறை சார்ந்த விழிப்புணர்வை இளைஞர்கள் மத்தியில் மேலும் அதிகரித்துள்ளது.









