திருச்சி மலைக்கோட்டை தெப்பக்குளத்தைச் சுற்றியுள்ள ஆக்கிரமிப்புகளை அகற்ற சென்னை உயர்நீதிமன்ற மதுரை கிளை ஏற்கனவே உத்தரவிட்டிருந்தது. இந்த உத்தரவின் அடிப்படையில், கடந்த ஏழு மாதங்களுக்கு முன்பு அப்பகுதியில் இருந்த 150-க்கும் மேற்பட்ட ஆக்கிரமிப்புக் கடைகள் அகற்றப்பட்டு, பாதிக்கப்பட்ட வியாபாரிகளுக்கு மாநகராட்சி நிர்வாகம் சார்பில் மாற்று இடங்கள் வழங்கப்பட்டன.
இருப்பினும், மாற்று இடங்களில் போதிய வியாபாரம் இல்லை எனக் கூறி, தீபாவளி பண்டிகை முடியும் வரை என்.எஸ்.பி. சாலையில் வியாபாரம் செய்ய அனுமதிக்குமாறு வியாபாரிகள் கோரிக்கை விடுத்திருந்தனர். ஆனால், நீதிமன்ற உத்தரவைச் சுட்டிக்காட்டி மாநகராட்சி நிர்வாகம் இதற்கு அனுமதி மறுத்தது. இதனை மீறி, ஒருசில வியாபாரிகள் தள்ளுவண்டிகள் மற்றும் தரைக் கடைகளை அமைத்து என்.எஸ்.பி. சாலையில் வியாபாரம் செய்து வந்தனர்.
இதனைத் தொடர்ந்து, மாநகராட்சி அதிகாரிகள் மேற்கொண்ட அதிரடி ஆய்வில், ஆக்கிரமித்து வைக்கப்பட்டிருந்த 5 தள்ளுவண்டிக் கடைகள் பறிமுதல் செய்யப்பட்டன. மேலும், 10-க்கும் மேற்பட்ட சாலையோர ஆக்கிரமிப்புகள் அகற்றப்பட்டன. இனிவரும் காலங்களில் மீண்டும் ஆக்கிரமிப்பில் ஈடுபட்டால் கடும் சட்டப்பூர்வ நடவடிக்கை எடுக்கப்படும் என வியாபாரிகளுக்கு மாநகராட்சி அதிகாரிகள் எச்சரிக்கை விடுத்துள்ளனர்.









