திருவாரூர், புதுக்கோட்டை, தஞ்சாவூர் உள்ளிட்ட டெல்டா மாவட்டங்களில் இன்று கனமழை பெய்யக்கூடும் என வானிலை ஆய்வு மையம் எச்சரித்திருந்தது. அதற்கேற்ப, திருவாரூர் மாவட்டம் குடவாசல் மற்றும் அதன் சுற்றுவட்டாரப் பகுதிகளில் கடந்த ஒரு மணி நேரத்திற்கும் மேலாக கனமழை பெய்து வருகிறது.
காலை முதல் வானம் கருமேகங்களால் சூழப்பட்டிருந்த நிலையில், குடவாசல், ஓகை, மணப்பறவை, மஞ்சக்குடி, பெரும்பன்னையூர், மணக்கால் மற்றும் அய்யம்பேட்டை உள்ளிட்ட பல்வேறு பகுதிகளில் இந்த மழை வெளுத்து வாங்கியது.
தற்போது டெல்டா மாவட்டங்களில் சம்பா நெல் சாகுபடி பணிகள் தீவிரமாக நடைபெற்று வரும் சூழலில், போதுமான நீரின்றி பயிர்கள் காய்ந்து வந்தன. இந்த நேரத்தில் பெய்துள்ள இந்த திடீர் கனமழை நெல் பயிர்களுக்கு அமுதமாக அமைந்துள்ளதுடன், விவசாயிகளிடையே பெரும் மகிழ்ச்சியை ஏற்படுத்தியுள்ளது.
அதேவேளையில், தீபாவளி பண்டிகையை முன்னிட்டு சாலையோரங்களில் தற்காலிக கடைகள் அமைத்து வியாபாரம் செய்து வந்த வியாபாரிகள், இந்த திடீர் மழையால் வியாபாரம் பாதிக்கப்பட்டுள்ளதாக கவலை தெரிவித்துள்ளனர்.









