மயிலாடுதுறையின் வரலாற்றுச் சிறப்புமிக்க ஶ்ரீ அபயாம்பிகை சமேத மாயூரநாதர் சுவாமி கோயிலில், காவிரி துலா உற்சவத்தை முன்னிட்டு நடைபெற்ற திருத்தேரோட்டம் கோலாகலமாக நடைபெற்றது.
திருவாவடுதுறை ஆதீனத்திற்குச் சொந்தமான இக்கோயிலில், ஐப்பசி மாத காவிரி துலா உற்சவம் கடந்த அக்டோபர் 18-ம் தேதி தொடங்கியது. இதன் முக்கிய நிகழ்வான திருத்தேரோட்டம் இன்று காலை வெகு விமரிசையாக நடைபெற்றது. ஶ்ரீ அபயாம்பிகை சமேத ஶ்ரீ மாயூரநாதர், வள்ளி-தேவசேனா சமேத ஶ்ரீ சுப்ரமணியர், விநாயகர் மற்றும் சண்டிகேஸ்வரர் ஆகிய பஞ்சமூர்த்திகள் சிறப்பு அலங்காரத்தில் தனித்தனி தேர்களில் எழுந்தருளினர்.
திருவாவடுதுறை ஆதீனம் 24-வது குருமகா சன்னிதானம் ஶ்ரீலஶ்ரீ அம்பலவாண தேசிக பரமாசாரிய சுவாமிகள் தேரோட்டத்தை வடம் பிடித்துத் தொடங்கி வைத்தார். சிவ கைலாய வாத்தியங்கள், மேளதாளங்கள் மற்றும் தேவார இன்னிசையுடன், நாட்டுப்புறக் கலைஞர்களின் கலை நிகழ்ச்சிகள் சூழ, ஆயிரக்கணக்கான பக்தர்கள் 'ஓம் நமசிவாய' கோஷத்துடன் தேரை வடம் பிடித்து இழுத்தனர். நான்கு ரத வீதிகளிலும் வலம் வந்த தேர்கள் நிலையை அடைந்தன.
மயிலாடுதுறை மாவட்ட காவல் கண்காணிப்பாளர் சினேஹபிரியா தலைமையில் பலத்த போலீஸ் பாதுகாப்பு ஏற்பாடுகள் செய்யப்பட்டிருந்தன. துலா உற்சவத்தின் உச்சகட்ட நிகழ்வான 'கடைமுக தீர்த்தவாரி' நாளை நடைபெற உள்ளது. இதில் காவிரியின் இரு கரைகளிலும் உள்ள சிவாலயங்களில் இருந்து பஞ்சமூர்த்திகள் எழுந்தருளி தீர்த்தவாரி நடைபெற உள்ளது, இதில் பல்லாயிரக்கணக்கான பக்தர்கள் பங்கேற்பார்கள் என எதிர்பார்க்கப்படுகிறது.









