புதுக்கோட்டையில் 'விதைக்கலாம்' நண்பர்கள் குழுவினர் வாரந்தோறும் ஞாயிற்றுக்கிழமைகளில் தொடர்ச்சியாக மரக்கன்றுகளை நட்டு சமூகப் பணியில் ஈடுபட்டு வருகின்றனர். இந்த அமைப்பு தொடங்கப்பட்டு தற்போது 585-வது வாரம் எட்டப்பட்டுள்ளது. அமைப்பு தொடங்கப்பட்ட நாள் முதல் ஒரு வாரம் கூட இடைவெளி இன்றி, தொடர்ச்சியாக மரக்கன்று நடும் பணியை இவர்கள் மேற்கொண்டு வருவது குறிப்பிடத்தக்கது.
இந்த அமைப்பில் ஆசிரியர்கள், கவிஞர்கள், பல்துறை வல்லுநர்கள் மற்றும் இளைஞர்கள் ஆர்வமுடன் இணைந்து செயலாற்றி வருகின்றனர். குறிப்பாக, கடுமையான கொரோனா ஊரடங்கு காலத்தில் கூட, தங்களது வீட்டைச் சுற்றியுள்ள பகுதிகளில் மரக்கன்றுகளை நட்டு தங்களது இயற்கைப் பணியை அவர்கள் கைவிடாமல் தொடர்ந்தனர்.
இந்நிலையில், இந்த வாரம் ஞாயிற்றுக்கிழமை தீபாவளி பண்டிகை கொண்டாடப்பட்ட போதிலும், அதைக் பொருட்படுத்தாமல் புதுக்கோட்டையை அடுத்த சேங்கைத் தோப்பு செல்லையா கோயில் வளாகத்தில் 'விதைக்கலாம்' குழுவினர் 10 மரக்கன்றுகளை நட்டுள்ளனர். பொதுமக்களுக்கு தீபாவளி திருநாளாக இருந்தாலும், தங்களுக்கு ஒவ்வொரு ஞாயிற்றுக்கிழமையும் மரக்கன்றுகளுடனான தீபாவளிதான் என்று கூறி, இவர்கள் இந்த நாளையும் மரநடுகையுடன் அர்த்தமுள்ளதாகக் கொண்டாடியுள்ளனர்.









