திருப்பத்தூர் மாவட்டம்: வாணியம்பாடியில் 125 ஆண்டுகளுக்கும் மேலாக குற்றவியல் நடுவர் நீதிமன்றமும், 31 ஆண்டுகளாக மாவட்ட உரிமையியல் நீதிமன்றமும், 17 ஆண்டுகளாக சார்பு நீதிமன்றமும் செயல்பட்டு வருகின்றன. மேலும், மாவட்ட வருவாய் அலுவலர் அலுவலகம், பழமையான கருவூலம், வனச்சரக அலுவலகம் உள்ளிட்ட முக்கிய அரசு அலுவலகங்களும் இங்கு அமைந்துள்ளன.
வாணியம்பாடி நீதித்துறை எல்லைக்கு உட்பட்டு மாவட்டத்திலேயே அதிகபட்சமாக 8 காவல் நிலையங்கள் செயல்பட்டு வருகின்றன. மேலும், மலைப் பகுதிகளைச் சேர்ந்த பொதுமக்களும் வாணியம்பாடிக்கு நேரடிப் பேருந்து வசதி மூலம் எளிதில் வந்து செல்ல முடியும்.
எனவே, வாணியம்பாடியில் கூடுதல் மாவட்ட அமர்வு நீதிமன்றம் அமைக்கப்பட்டால் வழக்காடிகள், பொதுமக்கள், காவல்துறையினர் மற்றும் வழக்கறிஞர்களின் பயண நேரமும் செலவும் குறைவதுடன், வழக்குகள் விரைந்து விசாரிக்கப்படுவதற்கும் உதவியாக இருக்கும். இதனைக் கருத்தில் கொண்டு, பொதுமக்களின் நலன் கருதி வாணியம்பாடியிலேயே கூடுதல் மாவட்ட அமர்வு நீதிமன்றம் அமைக்க தமிழக அரசும் நீதித்துறையும் உடனடியாக நடவடிக்கை எடுக்க வேண்டும் என வழக்கறிஞர் சங்கங்களின் கூட்டு நடவடிக்கைக் குழுவினர் வலியுறுத்தியுள்ளனர்.









