திருப்பத்தூர் மற்றும் அதன் சுற்றுவட்டாரப் பகுதிகளில் சாலை மறுசீரமைப்பின் போது பழைய சாலையை அகற்றாமல் அதன் மீதே புதிய தார்ச்சாலை அமைப்பதால், சாலைகளின் உயரம் அதிகரித்து பொதுமக்கள் கடுமையான பாதிப்புகளைச் சந்தித்து வருகின்றனர். இது தொடர்பாக நடவடிக்கை எடுக்கக் கோரி அறப்போர் இயக்கம் சார்பில் நகராட்சி மற்றும் நெடுஞ்சாலைத்துறை அதிகாரிகளிடம் கோரிக்கை மனு அளிக்கப்பட்டது. திருப்பத்தூர் மாவட்டத்தில் பல்வேறு இடங்களில் சாலை சீரமைப்புப் பணிகள் நடைபெற்று வருகின்றன. பொதுவாகச் சாலைகளை அமைக்கும்போது பழைய தார்ச்சாலையைச் சுரண்டி எடுத்துவிட்டு (Milling), சமதளப்படுத்திய பின்னரே புதிய சாலையை அமைக்க வேண்டும். ஆனால், பல இடங்களில் பழைய சாலையை அகற்றாமல் அதன் மீதே மீண்டும் மீண்டும் புதிய தார்ச்சாலைகள் அமைக்கப்படுவதாகக் கூறப்படுகிறது. இதனால் சாலையின் மட்டம் தொடர்ந்து உயர்ந்து, சாலையோர குடியிருப்புகள் மற்றும் கடைகள் பள்ளத்தில் செல்லும் நிலை உருவாகியுள்ளது. இதன் விளைவாக, மழைக்காலங்களில் சாலைகளில் பெருக்கெடுத்து ஓடும் மழைநீரும் கழிவுநீரும் வீடுகளுக்குள் புகுந்து பொதுமக்கள் பெரும் அவதிக்குள்ளாகின்றனர். இப்பிரச்சனைக்கு உடனடியாகத் தீர்வு காண வலியுறுத்தி, அறப்போர் இயக்க தன்னார்வலர்கள் சம்பந்தப்பட்ட அதிகாரிகளை நேரில் சந்தித்துக் கோரிக்கை மனு மற்றும் விழிப்புணர்வுத் துண்டறிக்கைகளை வழங்கினர். திருப்பத்தூர் நகராட்சி ஆணையர் சாந்தி, திருப்பத்தூர் வட்டார வளர்ச்சி உதவி அலுவலர், திருப்பத்தூர் நெடுஞ்சாலைத் துறை உதவி கோட்டப் பொறியாளர் (AD), திருப்பத்தூர் நெடுஞ்சாலைத்துறை பொறியாளர் மற்றும் ஜோலார்பேட்டை வட்டார வளர்ச்சி அலுவலர் ஆகியோரிடம் இந்த மனு அளிக்கப்பட்டது. சாலைப் பணிகளை விதிமுறைகளின்படி முறையாக மேற்கொள்ள வேண்டும் எனவும், பழைய சாலையை அகற்றாமல் புதிய சாலை அமைக்கும் பணிகளை உடனடியாகத் தடுத்து நிறுத்த வேண்டும் எனவும் அந்த மனுவில் அறப்போர் இயக்கம் வலியுறுத்தியுள்ளது.
செய்திகள்
பழைய சாலையை அகற்றாமல் புதிய தார்ச்சாலை: வீடுகளுக்குள் மழைநீர் புகும் அபாயம் என அதிகாரிகளிடம் அறப்போர் இயக்கம் மனு
🕒 6 நவ., 2026, 06:48 AM
⏱️ 1 நிமிடம் வாசிப்பு

📸1 / 1
✨
AI Highlights
- •பழைய சாலையை அகற்றாமல் புதிய தார்ச்சாலை: வீடுகளுக்குள் மழைநீர் புகும் அபாயம் என அதிகாரிகளிடம் அறப்போர் இயக்கம் மனு
செய்தியைக் கேளுங்கள்
Text-to-Speech








