அரியலூர் மாவட்டம், செந்துறை வட்டம், குழுமூர் கிராமத்தில் நடைபெற்ற மக்கள் தொடர்பு முகாமில், பொதுமக்களிடமிருந்து பெறப்பட்ட கோரிக்கை மனுவின் மீது மாவட்ட ஆட்சித்தலைவர் திருமதி ந. மிருணாளினி, இ.ஆ.ப., அவர்கள் நேரில் சென்று உடனடி ஆய்வு மேற்கொண்டு உரிய நடவடிக்கைகளை விரைவுபடுத்தியுள்ளார்.
குழுமூரில் நடைபெற்ற இம்முகாமில், மாவட்ட ஆட்சித்தலைவர் தலைமையில் பொதுமக்களிடமிருந்து பல்வேறு கோரிக்கைகள் அடங்கிய மனுக்கள் பெறப்பட்டன. குறிப்பாக, குழுமூர் பெரியார் நகர் பகுதியில் புதிய சாலை மற்றும் மழைநீர் வடிகால் வசதி அமைத்துத் தருமாறு பொதுமக்கள் கோரிக்கை விடுத்தனர்.
பொதுமக்களின் கோரிக்கையின் தீவிரத்தை உணர்ந்த மாவட்ட ஆட்சித்தலைவர், மனுவைப் பெற்ற அன்றைய தினமே குழுமூர் பெரியார் நகர் பகுதிக்கு நேரில் சென்று ஆய்வு மேற்கொண்டார். அப்பகுதியில் கழிவுநீர் வடிகால் வாய்க்காலினைச் சீரமைக்கவும், சாலையோரங்களில் உள்ள சீமகருவேல மரங்களை அகற்றவும் அவர் உத்தரவிட்டார்.
மேலும், தனிநபர் வீடுகளிலிருந்து வெளியேறும் கழிவுநீர் நீர்நிலைகளில் கலக்காமல் தடுத்து, நீர் உறிஞ்சுக்குழிகள் மூலம் பாதுகாப்பாக அப்புறப்படுத்தவும், தனிநபர் சுகாதாரத்தைப் பேணிக்காக்கவும் அறிவுறுத்தினார். இப்பகுதியில் சாலை வசதி ஏற்படுத்துவதற்காக ஏற்கனவே மேற்கொள்ளப்பட்ட கணக்கெடுப்புப் பணிகளைத் விரைந்து முடித்து, சாலை அமைப்பதற்கான நடவடிக்கைகளைத் உடனடியாகத் தொடங்க வேண்டும் என சம்பந்தப்பட்ட துறை அலுவலர்களுக்கு அவர் உத்தரவிட்டார்.
இந்த ஆய்வின் போது, ஊராட்சிகளின் உதவி இயக்குநர் திரு. செந்தில், வட்டார வளர்ச்சி அலுவலர் திருமதி ஸ்ரீதேவி உள்ளிட்ட அரசுத்துறை அலுவலர்கள் பலர் உடனிருந்தனர்.









