விழுப்புரம் மரகதம் மருத்துவமனையும், சென்னை காவேரி மருத்துவமனையும் இணைந்து பொதுமக்களுக்கு உயர்தர மருத்துவச் சேவைகளை வழங்கும் நோக்கில் புதிய மருத்துவ வசிகளை அறிமுகப்படுத்தியுள்ளன.
இதன் ஒரு பகுதியாக, 24 மணி நேர அவசர சிகிச்சை பிரிவு, நவீன தீவிர சிகிச்சைப் பிரிவு (ICU), டெலிஐசியூ (Tele-ICU) கண்காணிப்பு மற்றும் முழுமையான மருத்துவ உபகரணங்களுடன் கூடிய 24 மணி நேர ஆம்புலன்ஸ் சேவைகள் தொடங்கப்பட்டுள்ளன. மேலும், காவேரி மருத்துவமனையின் சிறப்பு மருத்துவர்கள் வாரந்தோறும் விழுப்புரம் வந்து பொதுமக்களுக்கு மருத்துவ ஆலோசனை வழங்கவும், டெலி கன்சல்டேஷன் (Tele-consultation) வசதியை ஏற்படுத்தவும் திட்டமிடப்பட்டுள்ளது.
இதனுடன், மூன்று டயாலிசிஸ் இயந்திரங்களுடன் கூடிய சிறுநீரக சிகிச்சை சேவையும் தொடங்கப்பட உள்ளது. விரைவில் இங்கு சிறுநீரக மாற்று அறுவை சிகிச்சை மேற்கொள்வதற்கான நடவடிக்கைகளும் தீவிரமாக நடைபெற்று வருகின்றன.
இந்தத் தொடக்க விழாவில் காவேரி மருத்துவமனை மருத்துவச் சேவைகள் இயக்குநர் டாக்டர் கிளைவ் பெர்னாண்டஸ், டாக்டர் வெற்றிச்செல்வன், மரகதம் மருத்துவமனை நிர்வாகி வீரபாபு உள்ளிட்டோர் கலந்து கொண்டனர்.
விழுப்புரம் மற்றும் அதன் சுற்றுவட்டாரப் பகுதி மக்கள் அவசர மற்றும் உயர்தர மருத்துவச் சிகிச்சைகளுக்காக சென்னை போன்ற பெருநகரங்களுக்குச் செல்ல வேண்டிய தேவையைக் குறைத்து, உலகத்தரத்திலான சிகிச்சையை உரிய காலத்தில் குறைந்த செலவில் வழங்குவதே இந்தக் கூட்டமைப்பின் முக்கிய நோக்கம் என மருத்துவமனை நிர்வாகத்தினர் தெரிவித்தனர்.









