நாமக்கல் மாவட்ட ஆட்சியரக பெருந்திட்ட வளாகத்தில் சுற்றுச்சூழல் பாதுகாப்பை மேம்படுத்தும் நோக்கில், 1,000 மரக்கன்றுகள் நடும் 'மகிழ் வனம்' திட்டம் தொடங்கப்பட்டுள்ளது.
நாமக்கல் மாவட்ட கண்காணிப்பு அலுவலரும், சிறுபான்மையினர் நல ஆணையருமான ஆசியா மரியம், மாவட்ட ஆட்சியர் மதுபாலன் தலைமையில் இப்பணியைத் தொடங்கி வைத்து, மரக்கன்றுகளை நட்டு வைத்தார். நாமக்கல் மாவட்டத்தில் பசுமைப் பரப்பை அதிகரிக்கும் முயற்சியாக, சீமை கருவேல மரங்கள் முழுமையாக அகற்றப்பட்டு, அப்பகுதிகளில் பயன்தரும் மரக்கன்றுகள் நடப்பட்டு வருகின்றன.
இந்த 'மகிழ் வனம்' திட்டத்தின் கீழ், மகிழம், புங்கன், அத்தி, பாதாம், நாவல், நீர்மருது, இலுப்பை, வேம்பு மற்றும் பல்வேறு வகையான பழ மரங்கள் உள்ளிட்ட பயன்தரும் மரக்கன்றுகள் நடப்படுகின்றன. இந்நிகழ்ச்சியில் மாவட்ட காவல் கண்காணிப்பாளர் யாதவ் கிரீஷ் அசோக், மாவட்ட வன அலுவலர் அகேலா சைதன்யா மாதவுடு, மாவட்ட வருவாய் அலுவலர் சரவணன் உள்ளிட்ட பல்வேறு அரசுத்துறை உயர் அலுவலர்கள் மற்றும் மாணவர்கள் கலந்துகொண்டனர்.









