கிருஷ்ணகிரி மாவட்டம், மேல்அம்மனேரி பகுதியில் தனியாக வசித்து வந்த முனியம்மாள் (80) என்ற மூதாட்டி, கடந்த புதன்கிழமை தனது வீட்டில் மர்மமான முறையில் உயிரிழந்த நிலையில் கண்டெடுக்கப்பட்டார். அவர் அணிந்திருந்த தங்க நகைகள் மாயமாகியிருந்ததால், இது குறித்து கிருஷ்ணகிரி தாலுகா காவல்துறையினர் சந்தேக மரணம் என வழக்குப்பதிவு செய்து விசாரணை மேற்கொண்டு வந்தனர்.
தொடர் விசாரணையில், பிரேத பரிசோதனை அறிக்கையில் மூதாட்டி மூச்சுத் திணறடிக்கப்பட்டு கொலை செய்யப்பட்டது உறுதி செய்யப்பட்டது. இதனைத் தொடர்ந்து, அப்பகுதியில் வசிக்கும் நாகம்மாள் (40) என்பவரிடம் காவல்துறையினர் தீவிர விசாரணை நடத்தினர்.
விசாரணையில், நாகம்மாளும் அவரது கள்ளக்காதலன் குண்டா பெருமாளும் (43) சேர்ந்து, நகைக்காக முனியம்மாளின் முகத்தை போர்வையால் அழுத்தி கொலை செய்தது அம்பலமானது. இதனையடுத்து, இருவரையும் கைது செய்த காவல்துறையினர், அவர்கள் மீது கொலை வழக்குப்பதிவு செய்து விசாரணை நடத்தி வருகின்றனர்.









