திருப்பத்தூர் மாவட்டம், நாட்றம்பள்ளி தாலுகா, செட்டேரிடேம் பகுதியில் வசிக்கும் இருளர் இன மக்களுடன் இணைந்து 'ஐக்கிய சட்ட உரிமைகள் கழகம்' சார்பில் தீபாவளி பண்டிகை உற்சாகமாகக் கொண்டாடப்பட்டது.
முறையான வாழ்வாதாரமின்றி வறுமையில் வாடும் இப்பகுதி மக்களுக்கு தீபாவளி பண்டிகையைக் கொண்டாடப் பொருளாதார வசதி இல்லாத நிலை இருந்தது. இதனை அறிந்த ஐக்கிய சட்ட உரிமைகள் கழகம் - ஆசியா அமைப்பின் மாவட்ட தலைவர் விமல்ராஜ், மாநில ஒருங்கிணைப்பாளர் பாலமுருகன் மற்றும் டி.வி.எஸ் சம்பத்குமார் ஆகியோர் நேரில் சென்று இருளர் இன மக்களுக்கு சுவையான பிரியாணி, பட்டாசு, இனிப்புகள் மற்றும் அதிரசம் ஆகியவற்றை வழங்கினர்.
மேலும், அப்பகுதி மக்களுடன் இணைந்து மத்தாப்பு கொளுத்தி தீபாவளியைக் கொண்டாடியதோடு, சிதிலமடைந்துள்ள அவர்களின் குடியிருப்புகள் விரைவில் சீரமைக்கப்படும் என்றும் உறுதியளித்தனர். இந்நிகழ்வில், மாநில வர்த்தக அணி செயலாளரும், முருகம்மாள் ரெசிடென்சி உரிமையாளருமான கணபதி உள்ளிட்டோர் உடனிருந்தனர்.









