திருப்பத்தூர் மாவட்டம் வாணியம்பாடியில், 1903-ஆம் ஆண்டு பாலாற்றில் ஏற்பட்ட வரலாற்றுப் பெருவெள்ளத்தில் உயிரிழந்த 200-க்கும் மேற்பட்ட பொதுமக்கள் மற்றும் 3,000-க்கும் அதிகமான கால்நடைகளின் 123-ஆம் ஆண்டு நினைவு தினம் இன்று அனுசரிக்கப்பட்டது. பாலாறு கூட்டியக்கம் சார்பில் நடைபெற்ற இந்த நிகழ்வில், வாணியம்பாடி பேருந்து நிலையத்திலிருந்து ஊர்வலமாகச் சென்ற விவசாயிகள் மற்றும் பொதுமக்கள், பாலாறு சர்க்கிளில் உள்ள நினைவுத்தூணுக்கு மலர் தூவி மெழுகுவர்த்தி ஏந்தி அஞ்சலி செலுத்தினர்.
இந்த நிகழ்வில் சிறப்பு அழைப்பாளராகப் பங்கேற்ற தமிழக விவசாயிகள் பாதுகாப்பு சங்கத்தின் நிறுவனத் தலைவர் ஈசன் முருகசாமி, பாலாற்றைப் பாதுகாக்கப் போராடிய முன்னோடிகளுக்கு மரியாதை செலுத்தினார். பின்னர் செய்தியாளர்களிடம் பேசிய அவர், பாலாற்றை ஆக்கிரமிப்புகளிலிருந்து மீட்டெடுத்து, கழிவுநீர் கலப்பதைத் தடுத்து சுற்றுச்சூழலைப் பாதுகாக்க அரசு போர்க்கால அடிப்படையில் நடவடிக்கை எடுக்க வேண்டும் என்று வலியுறுத்தினார்.
முக்கிய கோரிக்கைகள்:
- பாலாறு நீர்வள உரிமைகளைப் பாதுகாக்க மத்திய அரசு பாலாறு நடுவர் மன்றத்தை அமைக்க வேண்டும்.
- பாலாறு - தென்பெண்ணை ஆறுகள் இணைப்புத் திட்டத்தை விரைந்து செயல்படுத்த வேண்டும்.
- ஆந்திர மாநிலத்தின் அந்திரி நிவாஸ் திட்டத்தைப் பாலாறு வரை நீட்டிக்க நடவடிக்கை எடுக்க வேண்டும்.
தண்ணீருக்காக எதிர்காலத்தில் போர் ஏற்படும் அபாயம் உள்ளதாக முன்னாள் குடியரசுத் தலைவர் அப்துல் கலாம் எச்சரித்ததைச் சுட்டிக்காட்டிய ஈசன் முருகசாமி, ஆறுகளைப் பாதுகாப்பதை அரசு முதன்மைக் கொள்கையாகக் கொள்ள வேண்டும் என்றார். மேலும், திருப்பூர் நொய்யலாற்றில் நுரை பொங்குவதற்குத் தொழிற்சாலைக் கழிவுகளே முக்கிய காரணம் என்றும், பொதுமக்கள் பயன்படுத்தும் சோப்பு மற்றும் ஷாம்புதான் காரணம் என்று கூறுவது உண்மையை மறைக்கும் செயல் என்றும் அவர் குற்றம்சாட்டினார். சட்டவிரோதமாகக் கழிவுநீரை வெளியேற்றும் தொழிற்சாலைகள் மீது அதிகாரிகள் தீவிர கண்காணிப்பு மற்றும் கடுமையான நடவடிக்கை எடுக்க வேண்டும் என்றும் அவர் வலியுறுத்தினார்.









