வேலூர் மாவட்டம் குடியாத்தம் செருவங்கி பகுதியில் அமைந்துள்ள மேல்பட்டி சாலையில், அடிப்படை வசதிகள் கோரி அப்பகுதி மக்கள் இன்று காலை திடீர் சாலை மறியலில் ஈடுபட்டனர்.
செருவங்கி பகுதியில் உள்ள காவிரி நகர் மற்றும் பாரதிதாசன் நகர் ஆகிய பகுதிகளில், நீண்ட காலமாக முறையான கழிவுநீர் கால்வாய் வசதி செய்யப்படவில்லை. இதனால் மழைக்காலங்களில் அப்பகுதியில் தேங்கும் நீரால் பொதுமக்களுக்கு கடுமையான போக்குவரத்து மற்றும் சுகாதாரச் சிரமங்கள் ஏற்பட்டு வருகின்றன. இதனைக் கண்டித்தும், உடனடியாக கழிவுநீர் கால்வாய் அமைத்துத் தர வலியுறுத்தியும் அம்பேத்கர் சிலை அருகே பொதுமக்கள் மேல்பட்டி சாலையில் அமர்ந்து மறியல் போராட்டத்தில் ஈடுபட்டனர்.
தகவலறிந்து சம்பவ இடத்திற்கு விரைந்து வந்த நகர காவல் ஆய்வாளர் சிவகுமார் மற்றும் நகராட்சி ஆணையர் தனலட்சுமி ஆகியோர், போராட்டத்தில் ஈடுபட்ட பொதுமக்களுடன் பேச்சுவார்த்தை நடத்தினர். பொதுமக்களின் கோரிக்கைகள் மீது உரிய நடவடிக்கை எடுக்கப்படும் என்று அவர்கள் உறுதியளித்தனர்.
இதனைத் தொடர்ந்து, கலைந்து சென்ற பொதுமக்களில் சில முக்கிய பிரமுகர்கள், நகராட்சி ஆணையர் மற்றும் காவல் ஆய்வாளரை காவிரி நகர் மற்றும் பாரதிதாசன் நகர் பகுதிகளுக்கு நேரில் அழைத்துச் சென்றனர். அங்கு கழிவுநீர் கால்வாய் இல்லாததால் மக்கள் எதிர்கொள்ளும் இன்னல்களை அவர்கள் விரிவாக விளக்கி எடுத்துரைத்தனர்.
அப்போது ஆணையரிடம் பொதுமக்கள் முக்கிய கோரிக்கை ஒன்றை முன்வைத்தனர். நகராட்சி பகுதிக்குள் இருந்து வெளியேறும் கழிவுநீருக்காக கால்வாய் அமைக்கும் பணி தங்கள் ஊராட்சி பகுதி வழியாக நடைபெற்று வருவதாகவும், அதேபோன்று தங்கள் ஊராட்சி பகுதிக்குள்ளும் கழிவுநீர் கால்வாயை உடனடியாக அமைத்துத் தர தொடர்புடைய நிர்வாகம் நடவடிக்கை எடுக்க வேண்டும் என்றும் அவர்கள் வலியுறுத்தினர்.









